O BNG reuniuse onte coa veciñanza afectada polo trazado deste novo vial que recolle o PXOM aprobado inicialmente polo Pleno co voto en contra do grupo nacionalista
No BNG somos moi conscientes de que Betanzos precisa un PXOM, mais non este PXOM. Por iso o consideramos unha oportunidade perdida, a oportunidade de solucionar os problemas que actualmente ten este Concello e que este PXOM non resolve.
Co incremento da poboación que contempla o PXOM non se prevé chan para construír unha nova escola infantil ou un novo colexio. A única dotación prevista é un centro de día para dar escusa para construír bloques de pisos no Frade e o Areal, renunciando a ubicación no antigo ambulatorio que o PSOE defendía até agora. Tampouco recolle reserva de solo para un xeriátrico público, nunha comarca como a nosa que non ten unha soa praza de xeriátrico público.
“Pensamos que un documento da importancia dun PXOM merece dar participación á veciñanza e unha explicación do goberno da súa proposta”
“O PXOM non aborda os problemas que Betanzos ten. Pretende construír máis vivendas en zonas inundábeis, no Carregal e na Cañota, levantando as construcións 2,30 metros, cando o lóxico sería evitar construír nestas zonas”
“Impide que poidamos formular dúbidas ao equipo redactor, cambia a documentación a 48 horas de ter que pronunciarnos sobre ela e non dá opción de contrastarmos un documento como o PXOM co equipo redactor, os técnicos municipais ou os nosos técnicos”
“Hai que preservar a fisonomía tradicional da Cañota, coa proteción integral das Hortas- cos seus valos de chantos, canles e fisonomía tradicional- polo seu valor paisaxístico e impedir a construción que estrague esta zona”
As nacionalistas propoñen recualificar a casa contigua á Casa Consistorial para ampliar as dependencias do Concello e devolver as oficinas municipais ao Casco Histórico.
