“Pedimos ao goberno que valore outras opcións sen impacto no medio xa que existen diferentes alternativas con menor impacto ambiental e mesmo ecolóxicas ademais con un custo similar para as arcas públicas”

Betanzos, 15 de abril de 2017. O BNG pediu ao goberno local seriedade e transparencia no que respecta ás súas decisións sobre o parque do Pasatempo. “O goberno local tomou a decisión de o pasado martes de pechar o parque por unha praga de cydalima perspectlis, coñecida tamén como polilla asiática segundo os carteis que colgaron nas entradas para realizar un tratamento fitosanitario. Dende o BNG non entendemos a urxencia nin a necesidade de pechar o parque en plena Semana Santa cando ademais a veciñanza estaba convocada pola Plataforma en defensa do parque a unha xornada voluntaria de traballo para retirar maleza dunha parte do parque”, explicou o portavoz do BNG, Henrique del Río, “segundo parece o goberno local tomou a decisión onte de retirar os cartaces e permitir a entrada”.

Os nacionalistas reclamaron ao goberno local que explique as causas destas decisións. “O goberno local ten que escoitar á veciñanza. Pedímoslle unha vez máis que estea a altura dos veciños e veciñas que están traballando voluntariamente e recollendo sinaturas para a recuperación do Parque”, engadiu del Río, “estas decisións que dan a impresión de improvisación e mesmo de querer evitar as accións veciñais e, polo tanto, non axudan a chegar a acordos que permitan a recuperación do Pasatempo”.

“A veciñanza de Betanzos e os visitantes temos dereito a saber en base a que se decide pechar o parque do Pasatempo o día 12 para un tratamento fitosanitario que segundo o propio goberno non se vai realizar até o vindeiro luns día 17 e tamén que lles levou a tomar a decisión de reabrilo”, indicou o portavoz nacionalista, “non nos parece de recibo que se tomen decisións sen pensar e sen falar cos veciños e veciñas. O goberno ten que escoitar á xente e deixar de actuar en base a ocorrencias”.

O BNG reclamou un tratamento ecolóxico para combater a praga

“O produto elixido é a deltametrina, un insecticida de amplo espectro que pode ser nocivo se entra en contacto coa auga e que afectaría a outro tipo de insectos non só á polilla asiática ou papabuxos que se pretende combater”, explicou o portavoz nacionalista. “Pedimos ao goberno que valore outras opcións sen impacto no medio xa que existen diferentes alternativas con menor impacto ambiental e mesmo ecolóxicas ademais con un custo similar para as arcas públicas”, concluíu Del Río.