A visita guiada por Xesús Torres revela o evidente estado de abandono do xardín enciclopédico.

Betanzos, 12 de novembro de 2011. A organización xuvenil do BNG , Galiza Nova, organizou esta tarde unha visita guiada ao Pasatempo. Conduciu a visita o historiador Xesús Torres. O percorrido seguido serviu para revelar o evidente estado de abandono do xardín enciclopédico. A vexetación abandonada como puxo de destaque Torres impide contemplar incluso elementos singulares do propio parque.

O portavoz municipal do BNG, Henrique del Río, referiuse ao estado actual de abandono que presenta o parque, recordando que na última decada se investiron nel practicamente dous millóns de euros.  “Ter neste estado de abandono o parque despois de investir esta cantidade é unha indecencia”, afirmou.

“O BNG defende a conservación e posta en valor do Pasatempo como un motor económico para a creación de emprego” apuntou  Del Río, que lamentou “que o executivo actual  do PSOE supedite a conservación do Pasatempo á ordenación urbanística do Carregal”.

Os nacionalistas atopan un paralelismo na postura do PP co Pasatempo e co Casco Histórico. “Nos dous casos o PP esqueceunos durante catro anos e agora saca da manga plans e declaracións efectistas que non teñen un traslado real na recuperación dos dous referentes monumentais de Betanzos”.