Betanzos,  20 de xaneiro de 2022.- O BNG presentou unha iniciativa no Parlamento pedindo á Xunta que concrete compromisos de actuación do programa Rexurbe en Betanzos para este ano 2022. “Na actualidade, no centro histórico de Betanzos o IGVS é propietario de 20 vivendas, a maioría delas adquiridas hai máis de 10 anos”, indicou a deputada nacionalista Mercedes Queixas. “Desde o ano 2011 a Xunta rehabilitou 8 destas vivendas; consecuentemente, máis da metade das vivendas adquiridas pola Xunta están en situación de abandono en 2022”, engadiu Queixas. 

“Dada a importancia patrimonial do Centro Histórico de Betanzos e a necesidade de vivenda de promoción pública, nomeadamente por parte da mocidade, así como a importancia a nivel económico para toda a comarca pola proxección turística da localidade, para o BNG sería prioritario continuar con esta rehabilitación que coloque no mercado unha maior oferta pública de vivenda accesíbel, razón pola que foi incorporada desde o noso grupo parlamentario, como en anos anteriores, unha emenda para tal fin nos orzamentos da Xunta para 2022 que non foi aceptada polo Partido Popular”, explicou a deputada do BNG. 

“O PP vén afirmando que este investimento se recolle dentro do programa Rexurbe, pero o certo é que este non aparece territorializado, co que é imposíbel saber se o investimento é para o Centro Histórico de Betanzos ou outros, por iso pedimos que concrete investimento e prazos para a rehabilitación das vivendas que o IGVS ten en Betanzos”, concluíu Mercedes Queixas. 

O casco histórico de Betanzos é un dos máis importantes do noso país e está nun estado de conservación lamentábel, asistindo ano tras ano a unha deterioración cada vez máis irrecuperábel que fai perder relevancia e identidade histórica a Betanzos, declarada cidade do Reino de Galiza polo rei Henrique IV en 1465.