Betanzos, 26 de xaneiro de 2026. O BNG de Betanzos vén de presentar senllas iniciativas plenarias para solicitar unha mellor atención á veciñanza no centro de saúde de Betanzos e a dotación de persoal da oficina da Seguridade Social.

No BNG poñe o foco na deficiente atención que se está a prestar no centro de especialidades de Betanzos. Segundo a concelleira Amelia Sánchez, “ao longo dos últimos meses as usuarias acostumáronse a ter que agardar máis dunha semana para ter cita no seu médico de cabeceira ou no seu pediatra, unha espera que superou as dúas semanas durante o Nadal e que se mantén a día de hoxe”.

As nacionalistas esixen que se cubran as prazas que sexan necesarias así como que se tomen medidas urxentes para garantirlle unha atención digna á veciñanza de Betanzos.

No referente á oficina da Seguridade Social, a voceira nacionalista indicou que foron xa múltiples as iniciativas que desenvolveron sobre esta cuestión. “Os episodios de falta de citas ou de peches veñen sucedéndose durante os últimos anos e, nas últimas semanas, foron numerosas as veciñas e veciños de Betanzos os que indicaron que non resultaba posíbel obter citas en Betanzos e que eran redirixidos a Melide, a Ortigueira ou á Coruña, no mellor dos casos”.

No BNG indican que non se comprende a falta de atención do Ministerio con esta oficina, posto que existe unha carga de traballo elevada e o servizo dá cobertura a un territorio extenso. Cumpriría realizar todas as actuacións que sexan precisas para cubrir a totalidade das prazas vacantes e garantir, así como axilizar, a cobertura que esta oficina presta á veciñanza de Betanzos e da súa comarca.