O BNG denuncia que o Concello asumirá un plan de estabilidade para pagar o electoralismo do PSOE
O plan económico do PSOE supón anular varias partidas, entre elas varias de fondos para subministro eléctrico. Todos os modificativos do orzamento levan facturas de enerxía eléctrica, e segundo o concelleiro de Facenda as contas deste ano levaban a cantidade xusta para pagar polo subministro eléctrico, polo que anular agora partidas para a luz quere dicir que as facturas que entren e queden sen fondos terán que ir a outro modificativo
Betanzos, 26 de xullo de 2016. O BNG amosou a súa sorpresa diante do plan económico-financeiro presentado polo goberno local para facer viábel o Concello de Betanzos a curto prazo logo de que os gastos na campaña de ñapas electorais da precampaña das municipais desequilibrasen a estabilidade do Concello. Preocúpanos a situación porque o concelleiro de Facenda dixo sempre que a xestión económica era impecábel e agora o Ministerio de Facenda obriga a facer varios recortes e axustes para evitar a intervención, explicou Henrique del Río.
O edil nacionalista recordou que o Concello pechou o ano con 454 000 euros en facturas de servizos contratados sen fondos. Para pagalas fanse dúas modificacións ao orzamento recén aprobado, a segunda irá a pleno xunto co plan económico mañá mesmo informou. E todas son consecuencia dos rebacheos, pintados, flores e demais ñapas electorais que constituíron a precampaña electoral do PSOE en maio do ano pasado, abunda.
Desde o BNG cuestionan que o PSOE obrigue ao Concello a un plan económico a causa do plan de ñapas electorais, unhas obras inútiles que estan completamente estragadas un ano despois, electoralistas e clientelares. O PSOE sabía moi ben que estas obras electoralistas sen fondos para afrontalas ían acabar nisto pero deulle exactamente igual, lamentan.
Obviamente cuestionamos que o PP e Rajoy decidiran que os concellos asuman a débeda privada e opoñémonos a que a asuman, mais neste caso é o resultado dunha política clientelar, electoralista e miope, se non directamente irresponsábel, por parte do PSOE, explica Henrique del Río.
O plan económico do PSOE supón anular varias partidas, entre elas varias de fondos para subministro eléctrico e unha de investimentos. Ademais, proponse suprimir tamén os investimentos dun crédito coa Deputación solicitado para poñer ledes no alumeado público e usar os fondos para cubrir parte da débeda que o Concello ten.
Todos os modificativos do orzamento levan facturas de enerxía eléctrica, e segundo o concelleiro de Facenda as contas deste ano levaban a cantidade xusta para pagar polo subministro eléctrico, explica Del Río. Polo tanto, anular agora partidas para a luz quere dicir que as facturas que entren e queden sen fondos terán que ir a outro modificativo o ano que ven e a veciñanza pagaremos os xuros da demora, engade. É fuxir para diante por non querer facer as cousas ben e non asumir as responsabilidades dos propios actos, conclúe.
