“No BNG defendemos mudar a orde de prioridades na mobilidade nos espazos públicos e pasar do dominio absoluto do vehículo particular a outorgar preferencia aos peóns, logo ao transporte público colectivo, despois outras modalidades de transporte público e finalmente ao vehículo particular”

Betanzos, 23 de marzo de 2016. O BNG propoñerá no vindeiro Pleno que se elabore un plano de mobilidade sustentábel. “As políticas de mobilidade teñen que garantir a accesibilidade para todas, e este obxectivo implica a obediencia ás normas e a fixación de prioridades” explica o voceiro nacionalista, Henrique del Río. As nacionalistas entenden que “Betanzos carece absolutamente de políticas públicas encamiñadas a acadar esta mobilidade sustentábel”.

Basean esta análise no “incumprimento masivo, tolerado polo goberno municipal do PSOE, das mínimas normas de circulación do tránsito e o estacionamento”, condutas que dificultan a accesibilidade dos peóns, sobre todo daqueles con problemas de modalidade. Neste sentido, denuncian que “prazas e rúas peonís foron sacrificadas, sen mudar as normas, para dar paso a estacionamentos mentres a veciñanza sufraga reiteradamente a reparación de beirarrúas estragadas por vehículos mal estacionados ou a instalación de bolardos como única medida de garantía de espazos reservados aos peóns”.

Poñer en marcha un sistema de información sobre os horarios, frecuencias e rutas dos distintos transportes públicos- autobús e tren-, e deseñar unha aplicación para móbiles facilitarán á veciñanza o uso de buses e tren

Na mesma liña, cuestionan que “semanalmente o Campo sexa acoutado para estacionamento de motos para que as terrazas do Campo saquen máis lucro do espazo público en detrimento da veciñanza. Tamén denuncian que “o parque da estación é transformado en estacionamento tolerado durante as festas”.

“No BNG defendemos mudar a orde de prioridades na mobilidade nos espazos públicos e pasar do dominio absoluto do vehículo particular a outorgar preferencia aos peóns, logo ao transporte público colectivo, despois outras modalidades de transporte público e finalmente ao vehículo particular” explica Del Río. “Isto implica, obviamente, un novo modelo de cidade e, en consecuencia, un novo urbanismo inclusivo e sostíbel” engade.

Por este motivo, demandarán do Pleno a aprobación dun plan de mobilidade sustentábel que se basee en priorizar os usos peonís dos espazos públicos, garantindo a reserva de beirarrúas, prazas, rúas, parques, xardíns e demais espazos peonís para uso exclusivo das persoas.

Do mesmo xeito, desde o BNG propoñen “ubicar nas zonas de estacionamento situadas á entrada da cidade e na estación de tren e nas paradas de autobús mapas que indiquen a distancia ao centro e aos puntos de interese en metros, pero tamén no tempo que leva cubrir esa distancia a pé”.

Para desprazar o centro de gravidade do coche particular, propoñen medidas como facilitar e promover a mobilidade en bicicleta, creando itinerarios seguros para moverse en bicicleta, desincentivar o uso de vehículos particulares e priorizar o acceso peonil e en bicicleta ao centro da cidade.

Finalmente, tamén propoñen medidas para favorecer o transporte público que o Concello ten na súa man levar a cabo, como a posta en marcha dun servizo de transporte público que conecte as parroquias coa propia cidade de Betanzos, atendendo especialmente as fins de semana e o horario nocturno. “Poñer en marcha un sistema de información sobre os horarios, frecuencias e rutas dos distintos transportes públicos- autobús e tren-, e deseñar unha aplicación para móbiles facilitarán á veciñanza o uso de buses e tren”, conclúen.