Del Río: “Se non hai problema ningún coa afectación que este paseo fluvial vai ter sobre o Mandeo fágano publico. A que ven escondelo? Permitan que a xente coñeza o proxecto, non a propaganda que fan del”.

“Coinciden no diagnostico 8 entidades sociais da nosa comarca, pero o goberno local en lugar de admitir as críticas sigue sen ser capaz de escoitar nin chegar a acordos con ninguén como leva facendo toda a lexislatura”.

Betanzos, 23 de xaneiro de 2015. O BNG insistiu hoxe en reclamar ao goberno local que cumpra a directiva europea sobre ambiente que exixe que todos os proxectos que poidan afectar á rede Natura, como é o caso, se sometan a información pública. “É indignante como pretenden malgastar cartos de toda a veciñanza nun proxecto que vai ter graves consecuencias no Mandeo e aínda encima se negan a deixar que os veciños e veciñas opinen sobre se están de acordo ou non”, explicou o voceiro do BNG, Henrique del Río.

“Se non hai problema ningún coa afectación que este paseo fluvial vai ter sobre o Mandeo fágano publico. A que ven escondelo? Permitan que a xente coñeza o proxecto, non a propaganda que del fan, e que opine alegando”, reclamou o voceiro nacionalista Henrique del Río, que acusou ao goberno local do PSOE de intentar “matar ao mensaxeiro, para evitar que a veciñanza saiba como gastan os cartos de todos e todas”.

O voceiro nacionalista insistiu en que o goberno local de Betanzos non dixo toda a verdade á Xunta na carta que lle enviou para saber se era necesario someter o proxecto a impacto ambiental. “É un proxecto novo, substancialmente diferente que o aprobado pola Deputación dentro do Plan Mandeo que, por certo, tampouco fora sometido a avaliación ambiental”, explicou del Río, quen reclamou de novo ao alcalde “que faga públicos os dous proxectos e que a xente opine se é igual ou non”.

Textualmente na carta enviada á Xunta o Alcalde de Betanzos di o seguinte: “Las variaciones con respecto al proyecto de agosto de 2010 se refieren a la tipología de la senda en el sub-tramo de bosque perteneciente al tramo 1, localizado aguas arriba de la Fuente de los Ángeles y a la ejecución de una serie de mejoras en la red de saneamiento existente en el sub-tramo urbano del núcleo de Betanzos, también perteneciente al tramo 1”. “É dicir, cambios mínimos no primeiro treito do paseo e amaños nunha rede de saneamento inexistente cando en realidade hai diferenzas de calado entre o vello proxecto da Deputación e o novo proxecto do goberno local do PSOE”, explicou Del Río, quen preguntou se “é dicir a verdade falar de amaños nunha rede de saneamento no subtramo 1 do Paseo cando esa zona non ten saneamento”.

“O goberno local parece que quere facer parva á veciñanza dicindo cousas como que o Carrizal de San Xiao non se verá afectado cando o proxecto delimita o trazado pola parte de atrás da Xunqueira cunha pasarela de madeira”, indicou del Río. “Coinciden no diagnostico 8 entidades sociais da nosa comarca, pero o goberno local en lugar de admitir as críticas sigue sen ser capaz de escoitar nin chegar a acordos con ninguén como leva facendo toda a lexislatura. Non sabemos cal é o motivo polo que o PSOE ten tanto interese neste paseo, que xa intentou levar adiante por todos os medios desde o goberno da Deputación, sería bo que o explicaran á veciñanza”, indicou o voceiro nacionalista.

“Reclamamos o mesmo para a proposta de PXOM do PSOE, fágano publico e que a xente opine. Que medo hai en que os veciños saiban o que quere facer o goberno con cartos públicos?”, cuestionou o voceiro do BNG, que acusou ao PSOE de “cargar contra o BNG por facer públicos os seus plans”. “O BNG non ten necesidade de mentir: opina sobre a documentación que lle achega o goberno local e informa á veciñanza porque actúa lealmente coa veciñanza. Outros non poden dicir o mesmo”, engadiu Del Río, “a mentira ven sendo unha constante do goberno neste mandato, a mentira e a ocultación, sobran exemplos como a readmisión dos traballadores do GRUMIR, a gasolineira da Madalena, a antena de telefonía móbil de Viraventos, a ORA ou o hotel San Roque”.