“O saneamento para unhas vivendas particulares do final da rúa dos Ánxeles non debera ir a costa de todos os veciños e veciñas, alguén terá a responsabilidade de permitir que se fixera así e pretender tapala cun proxecto faraónico está fóra de lugar”.

O BNG convidou a unidade de accion as entidades ecoloxistas

Betanzos, 22 de xaneiro de 2015. O BNG reclamou ao PSOE que escoite a veciñanza e someta a exposición pública o novo proxecto do paseo pola beira do Mandeo, entre As Monxas e Os Caneiros. “O goberno local mandou á Xunta unha información que non é completamente correcta, xa que di que o proxecto só ten pequenas variacións con respecto ao do ano 2010 cando non é exactamente así”, explicou o voceiro nacionalista, Henrique del Río.

“O alcalde di que hai unha ‘variación’ no tocante á ‘execución dunha serie de melloras na rede de saneamento existente no subtramo urbano do núcleo de Betanzos” explicou Del Río. “Este tramo é o das hortas da Cañota e é mentira que se vaian facer melloras na rede de saneamento basicamente porque aí non hai ningunha rede de saneamento”, denuncian.

“De feito, o proxecto que impulsa o goberno local do PSOE prevé construír unha canalización de PVC con arquetas de formigón totalmente nova dentro da liña de deslinde do río” abunda. “E a ‘variación no subtramo de bosque pertencente ao subtramo 1’ da que fala o alcalde é o desmonte e pasarela pilotada pola ladeira do monte da fonte dos Ánxeles”, explica.

“Na súa carta o alcalde esquece explicar que hai outra ‘variación’ logo ao pasar unha pasarela de madeira pilotada polo Carrizal de San Xiao que a Xunta advertiu en 2010 que non se tocase”, ironiza o edil do BNG. “Unha media verdade é unha media mentira e cremos que responde á intención que tiña o goberno local do PSOE de evitar a avaliación ambiental do proxecto”, explica Del Río.

Desde o BNG volveron a pedir ao goberno local do PSOE que informe con transparencia deste asunto á veciñanza. “Información e transparencia non é propaganda, é expoñer o proxecto publicamente para que a veciñanza poida presentar o que estime oportuno”, puntualiza o portavoz municipal do BNG.

Os nacionalistas pediron novamente a retirada do proxecto por considerar que “é un gasto totalmente innecesario e prescindíbel”. “No momento actual hai moitísimas outras prioridades que atender e que non levantan tanto interese do goberno local”, engade Del Río. Desde o BNG insisten en que este paseo construído en madeira á beira do río e sobre un carrizal “vai ter un mantemento tremendo e vai destrozar a parte máis ou menos virxe que queda do río en Betanzos”.

Ademais, desde o BNG advertiron que “o saneamento para unhas vivendas particulares do final da rúa dos Ánxeles non debera ir a costa de todos os veciños e veciñas”. “O PSOE cando deu esa licenza de obra llo tiña que exixir ao promotor” explica o voceiro nacionalista.

“Se acaso haberá que exixir que o paguen do seu peto os edís do PSOE que permitiron facer o edificio sen enganchar á rede a finais dos anos 90, entre eles o actual alcalde e o actual concelleiro de urbanismo”, aseguran desde o BNG. “Alguén ten a responsabilidade disto e terá que asumila”, advirte o voceiro nacionalista, “pero desde logo está totalmente fóra de lugar tapala cun proxecto faraónico”.

O BNG convidou a unidade de accion as entidades ecoloxistas

Os nacionalistas celebraron que os grupos ecoloxistas da comarca pediran tamén a paralización do proxecto e propoñan unha alternativa. Desde o BNG convidaron a estas entidades a unha xuntanza “para que nos expliquen a súa proposta”.

Entendemos que é necesaria a unidade de acción para conseguir paralizar este sensentido” explican desde o BNG. “Descoñecemos a alternativa que deseñaron pero nos parece moi interesante sempre que pase pola retirada do proxecto do PSOE e supoña respectar o río, que é o noso grande patrimonio natural e non dilapidar cartos públicos en algo totalmente innecesario”.

Ademais, o BNG convidounos a traballar conxuntamente na mobilización e a concienciación social “para impedir esta barbaridade, que é un dispendio e un atentado ecolóxico”.