A placa descubrirase mañá nun acto que comeza ás 20:00 h e que rematará cun concerto do cantautor O’Leo i Arremecághona.

Betanzos, 22 de agosto de 2013. O BNG celebrará mañá a súa tradicional homenaxe a Antolín Faraldo, ao pé do monumento dedicado ao escritor e intelectual en Betanzos. No transcurso do acto os nacionalistas descubrirán unha placa conmemorativa que trata de resumir a vida e obra polas que o intelectual provincialista merece o recoñecemento público.

“En 2004 o Pleno do Concello acordou tributar unha homenaxe pública e posta en

valor da figura de Faraldo que incluíse o cambio da praca do seu monumento por outra que explique quen foi e a colocación do seu retrato na galería de honra da Sala Capitular do Concello”, recordan os nacionalistas. “Nin o goberno do PSOE nin antes o do PP quixeron acabar coa estupidez dunha placa que tan só di que Faraldo naceu e morreu, como calquera outra persoa”, denuncia o voceiro do BNG, Henrique del Río. “A figura de Antolín Faraldo continúa a ser incómoda para os herdeiros dos centralistas que el combatiu na década de 1840”, apuntou.

Por este motivo, o BNG asumiu o custe e a colocación dunha nova placa que explique a veciños e visitantes quen foi Antolín Faraldo. “O historiador Xesús Torres asumiu encantado a tarefa de condensar en apenas tres liñas a vida e obra de Faraldo”, explica o voceiro nacionalista. “É un pequeno xesto de desagravio, mais Betanzos continúa a ter unha enorme débeda pendente coa figura de Antolín”, indica o edil do BNG.

Así, cando remate a homenaxe que os nacionalistas tributan cada ano a este senlleiro conveciño, cantas persoas visiten o seu monumento poderán coñecer que

Antolín Faraldo foi xornalista e escritor e un dos primeiros pensadores do que logo deviu en ser o nacionalismo galego. “Secretario da Xunta Superior de Goberno de Galiza no alzamento de 1846 que rematou co sacrificio dos Mártires de Carral”, recorda a placa.

A homenaxe comezará ás 20:00 h ao pé do busto de bronce de Faraldo cunha lectura, a cargo do propio público, de diversos pasaxes da súa propia obra, así como de Castelao. A cita, logo do descubrimento da placa e o canto do Himno Galego, terá por peche un concerto do cantautor O’Leo i Arremecághona.