“É necesario que todas nos centremos en solucionar a situación para que un edificio como este teña un uso público, mais para chegar a ese acordo as persoas responsábeis desta situación deben asumir publicamente a súa responsabilidade para que o Concello de Betanzos deixe de dar o espectáculo bochornoso que está dando ao ter que acabar acudindo ao Xulgado”

Betanzos, 6 de xullo de 2015. O BNG-Asembleas Abertas demandou ao goberno local que trate do mesmo modo aos propietarios e subarrendatarios do Complexo Hotel San Roque que ao resto da veciñanza de Betanzos. “Xa está ben de privilexios para uns poucos. Se á veciñanza de Betanzos non se lle permite abrir un negocio sen licenza e se lle cobra ate o último euro de impostos e de taxas, entendemos que coa concesionaria do Hotel se ten que facer o mesmo”, explicou o voceiro nacionalista Henrique del Río.

“Hai dous anos apareceu unha empresa que subarrendou o hotel, o estacionamento e o museo-degustación de forma irregular, exactamente igual que agora”, recorda Henrique del Río. “Lucráronse explotando o edificio todo o verán, mais logo pecharon deixando sen pagar a empregados e provedores, e tampouco pagaron rendas, impostos nin taxas”, engade. “Vai sendo moita hora de que o Concello aprenda dos seus propios erros e non permita que a historia se repita, porque os prexudicados sempre son as mesmas persoas”, indicou Del Río.

É necesario que todas nos centremos en solucionar a situación para que un edificio como este teña un uso público, pero para chegar a ese acordo as persoas responsábeis desta situación deben asumir publicamente a súa responsabilidade

“Hai unha lei que regula as concesións administrativas e outra a apertura de negocios de hostalería, e están para cumprilas todas, non dependendo de quen se trate”, engadiu o voceiro nacionalista. “Para poder subarrendar o hotel e o aparcamento a empresa concesionaria ten que dar conta ao Concello e este ao Pleno. Mais enterámonos unha vez mais pola prensa, é imposíbel levar un control do que pasa coas concesións do Concello e de a quen lle corresponde pagar se se permiten este tipo de actuacións”, lamentou Del Río.

Hai dous anos apareceu unha empresa que subarrendou o hotel, o estacionamento e o museo-degustación de forma irregular, exactamente igual que agora

As nacionalistas sosteñen que o goberno local do PSOE sabía que o hotel ía reabrir porque “alguén terá que ter autorizado o seu enganche á rede de abastecemento de auga e de saneamento municipais”. “Antes das eleccións, nunha xuntanza da comisión de investigación o alcalde asegurou que cortarían o subministro de auga potábel” recorda Del Río. “Está claro que ou mentiu daquela, ou minte agora” engade.

Acordo de todos os grupos para solucionar a situación do Complexo San Roque

Desde o BNG-Asembleas Abertas pediron un acordo de todos os grupos para solucionar a situación do Complexo San Roque. “É necesario que todas nos centremos en solucionar a situación para que un edificio como este teña un uso público, xa que non deixa nin un euro de beneficio no Concello” engadiu o edil nacionalista. “Mais para chegar a ese acordo as persoas responsábeis desta situación deben asumir publicamente a súa responsabilidade para que o Concello de Betanzos deixe de dar o espectáculo bochornoso que está dando ao ter que acabar acudindo ao Xulgado”, concluíu del Río.