“Propuxemos no Pleno que lle deran o premio á Plataforma Galega polo Dereito ao Aborto pero o PSOE cre que cunha faixa no Concello xa fixo canto debía en defensa dos dereitos das mulleres”.

Betanzos, 7 de marzo de 2014. O BNG lamentou a falta de transparencia e información do goberno local do PSOE na concesión do premio Úrsula Meléndez de Texeda, que o Concello outorga en conmemoración do Día Internacional da Muller o 8 de marzo de cada ano. “Tivémonos que enterar polos medios de comunicación de cal era a persoa ou entidade galardonada”, explica o voceiro nacionalista, Henrique del Río.

“Na reunión cos voceiros o alcalde apenas soubo explicarnos os méritos en base aos que o PSOE defendía a súa proposta”, engade, “e os outros grupos quedamos de facer propostas alternativas se as tiñamos”. “O BNG levou unha proposta a Pleno e nin sequera recibimos contestación por parte do goberno local sobre cal era a proposta escollida e por que”, explica. “Fártanse de falar de transparencia pero logo rara é a vez que a practican”, engade.

Tivemos que coñecer polos medios a quen se lle outorgaba o premio do 8 de marzo, fixemos unha proposta que o goberno do PSOE nin sequera respostou

Os nacionalistas propuxeron que recibise o premio, pola súa loita en defensa do dereito das mulleres a decidir sobre o seu propio corpo, a Plataforma Galega polo Dereito ao Aborto. “En Ourense, onde o PSOE non é exemplo de nada que non sexan conflictos internos e corruptelas, déronlle o premio que o Concello dá o 8 de marzo, pero en Betanzos o PSOE cre que cunha faixa no Concello xa fixo canto debía en defensa dos dereitos das mulleres”, engade.

“O do PSOE é pura hipocrisía, tanto no tema concreto do aborto como na igualdade en xeral”, asegura o concelleiro do BNG. “Aprobaron hai 3 anos nestas datas un plan de igualdade que continúan incumprindo reiteradamente e para o que se negaron a dispoñer un só euro, como o BNG reclamaba cunha alegación ao orzamento que o PSOE nin sequera quixo debatir”, recorda.

A carroza do enterro da sardiña exhibíu o corpo da muller como reclamo, nunha escenificación sexista por parte do PSOE en vésperas do 8 de marzo

Os nacionalistas consideran que o executivo local salta continuamente por riba do plan de igualdade. “Para mostra, a carroza do enterro da sardiña celebrado hai uns días, totalmente sexista e exhibindo o corpo da muller como reclamo” explica. “A mesma muller-obxecto que seguen fomentando nas festas de agosto co número da raíña das festas, con cartos públicos en ambos casos”, engaden os nacionalistas. “E isto a pesar de que o plan de igualdade propagandístico que aprobaron hai tres anos fala claramente de combatir estereotipos sexistas”, ironiza Del Río.

“Desde que empezou a lexislatura, o PSOE non fixo absolutamente nada para avanzar nos dereitos das mulleres, cos cartos que recibiron para igualdade e loita contra a violencia de xenero fixeron uns calendarios”, denuncian os nacionalistas. “Só lles interesa a igualdade para facer electoralismo e publicidade e na practica diaria no Concello fan exactamente o mesmo que o PP: raíña das festas e carrozas sexistas” engaden. “O colmo xa é que festexen o Día Internacional da Muller no momento de volta a 40 anos atrás nos dereitos das mulleres cun encontro de artesanía”, cuestiona Del Río.

Concelleira de igualdade non temos, temos unha de igual-dá, que se tivese dignidade dimitiría

Por este motivo, desde o BNG reclaman á concelleira de Servizos Sociais, “porque concelleira de igualdade non temos, temos unha de igual-dá”, ironiza o voceiro nacionalista, “que faga o favor de comprometerse realmente coa igualdade e deixar de usar os dereitos das mulleres como arma electoral ou que teña dignidade e dimita”. “Mentres tanto non asistiremos a ningún acto a avalar a hipócrita política de igualdade do PSOE", aclara.