Os nacionalistas cuestionan tamén que o PSOE prefira contratar persoal de apoio para as festas mentres non se cubren servizos esenciais para o Concello, como a limpeza ou a policía local.

Betanzos, 3 de setembro de 2013. O Pleno exixiu ao alcalde o cese do concelleiro de persoal pola denuncia contra o Concello por cesión ilegal de traballadores. “Saber que algo é ilegal e permitilo é unha prevaricación”, indicou o voceiro nacionalista, Henrique del Río, no Pleno. Os nacionalistas pediron tamén que se poña esta situación en coñecemento da fiscalía para que a xustiza resolva sobre este tema. Para o BNG, “se é preciso contratar persoal, haberá que facelo polas vías legais e non en fraude de lei”.

Os nacionalistas cuestionan tamén que o PSOE prefira contratar, mesmo en fraude de lei, persoal de apoio para as festas mentres non se cubren servizos esenciais para o Concello, como a limpeza ou a policía local. “É preciso contratar unha secretaria para as festas coa que está caendo?”, preguntou Del Río. “Hai unha baixa de longa duración na escola infantil que o goberno do PSOE non cubre”, denunciou o voceiro do BNG, “o mesmo pasa con prazas de limpadoras no colexio ou policias locais”.

O Pleno, a instancias do BNG, exixiu ao goberno local do PSOE que achegue os informes que autorizaron a contratación deste persoal de apoio para as festas. “Exiximos un informe sobre a legalidade da subcontratación de persoal pola Admnistración Pública”, indicou o concelleiro nacionalista.

“O PSOE contratou persoal de apoio para a organización das festas por medio dunha empresa e que o persoal desta empresa utilizou dependencias e medios municipais”, afirmou Del Río. “Polo que sabemos, o contrato ía ser para a Feira Franca, até o 15 de xullo, mais esta persoa estivo no Concello até o 23 de agosto”, indican desde o BNG.

“O PSOE levou ante a Fiscalía ao goberno do PP por contratacións no Conservatorio deste estilo e agora contrata persoal de apoio para as festas do mesmo xeito”, denunciou o voceiro do BNG. “O que queda claro con todo isto é que por moito teatro que fagan PP e PSOE gobernan do mesmo xeito, utilizando os cartos públicos para facer clientelismo”, criticou.

PSOE e PP de acordo en que un técnico de promoción económica faga só festas

Os nacionalistas lamentan que PSOE e PP bloqueasen a solicitude doutro informe no que o goberno local aclare por que estraga os servizos do técnico de promoción económica na organización das festas. “O Concello paga todo o ano a nómina dun técnico que tiña que deseñar alternativas para combatir as cifras de desemprego e PSOE e PP están conformes en que só organice festexos”, denunciou o voceiro do BNG.

“Agora entendemos que inciativas encamiñadas a crear emprego como o banco de locais comerciais ou o viveiro de empresas estean, sequera, sen principiar porque o técnico de desenvolvemento económico está moi ocupado organizando a semana do pincho, que como todo o mundo sabe crea unha cantidade enorme de postos de traballo”, ironizou Del Río.