Os nacionalistas denuncian irregularidades na contratación dos bombeiros para cubrir o lanzamento do globo.

Betanzos, 2 de setembro de 2013. O BNG levou ao Pleno o malestar da veciñanza de Tiobre polo estado en que se atopan varios camiños da parroquia, “invadidos da vexetación”. Segundo explicou a concelleira María Otero, veciñas e veciños miran con preocupación como se vai alongando o verán sen que o executivo do PSOE desbroce as pistas que vertebran esta parte do concello.

“O O PSOE presentou non hai moito unha moción pedindo á Deputación que desbrozase as súas estradas, mais o goberno local esqueceu as súas obrigas”, indicou a nacionalista no Pleno. Por este motivo exixiu ao goberno local do PSOE que aclare “ten pensado facer fronte ás súas obrigas” e se os prazos do alcalde supoñerán desbrozar estes camiños “antes de que remate o verán”.

Desde o BNG insisten ao executivo do PSOE ante o risco para a seguridade da veciñanza que a situación actual supón. Esta situación, que se dá noutras parroquias, tamén está a darse en fincas e camiños próximos ao casco urbano. Así, os nacionalistas denunciaron recentemente a existencia de varias fincas a monte no entorno da Cañota e os Ánxeles e o estado de abandono e perigosidade que presenta un parque municipal na Condesa. “O goberno debe crer que cun bando do alcalde xa está todo solucionado”, ironizou a nacionalista María Otero no Pleno.

Os nacionalistas insisten en que o Concello ten medios técnicos e humanos para asumir estas actuacións, “mais é obvio que as prioridades do goberno local van por outro lado”.

Un problema de seguridade

Ademais, desde o BNG chamaron a atención sobre a situación do parque comarcal de bombeiros de Betanzos, que continúa en folga. “O pasado 16 de agosto, a empresa que leva o parque de bombeiros de Betanzos contratou a 3 bombeiros para cubrir o lanzamento do Globo”, denunciou Otero no Pleno, que advertiu que “este feito é ilegal”.

“O comité de empresa trasladoulle á empresa a ilegalidade na que ían incurrir con estes feitos”, indicou a concelleira do BNG. Que reclamou ao goberno local que aclare se tiña coñecemento destes feitos e, de ser o caso, por que non emitiu ningunha queixa. “Ten pensado trasladar estas situación ao consorcio provincial de bombeiros?” interpelou, entendendo que “é o desexábel para garantir a seguridade da veciñanza”.