“Co reparto imposto polo PP Betanzos perde un 18% dos fondos que lle corresponderían, que saen tamén dos impostos da súa veciñanza e que teñen que financiar servizos”. Caixa de recursos audiovisuais e viveiro de empresas, propostas do BNG.

Betanzos, 24 de xaneiro de 2014. O BNG presentou unha moción para reclamar á Deputación que asigne os fondos do plan DTC93 cos mesmos criterios de reparto que utiliza para o Plan de Obras e Servizos. “Co reparto imposto polo PP Betanzos perde un 18% dos fondos que lle corresponderían”, indica o voceiro nacionalista, Henrique del Río.

Os nacionalistas advirten que, tal como está baremado, co DTC93 o PP impón “uns criterios de reparto das axudas de xeito unilateral que benefician aos gobernos populares da Coruña, Ferrol e Santiago e que penaliza a concellos coma o noso”.

Para que os gobernos do PP nas cidades reciban máis, Betanzos perde o 18% dos fondos que lle corresponderían, que saen tamén dos impostos da súa veciñanza e que teñen que financiar servizos

Neste sentido, o Bloque demanda ao PP que rectifique e aplique para o reparto dos 18 millóns de euros do Plan DCT93 os mesmos criterios que se recollen nos plans de obras e servizos (POS) da Deputación. Este plan ten unhas bases consensuadas por todos os grupos que permanecen sen cambios aínda que mude o goberno provincial e prima o “equilibrio territorial” e os concellos rurais de menos de 50.000 habitantes.

O cambio unilateral do sistema de reparto das subvencións feito polo PP implica que A Coruña recibe un 90% máis de fondos públicos do que lle correspondería aplicando os criterios consolidados no POS, Ferrol un 60% e Santiago un 45%. “Para que os gobernos do PP nas cidades reciban máis, Betanzos perde o 18% dos fondos que lle corresponderían, que saen tamén dos impostos da súa veciñanza e que teñen que financiar servizos”, explica o voceiro nacionalista.

“O PP usa a Deputación para facer un reparto a medida de fondos públicos para tratar de beneficiar aos seus alcaldes nas tres grandes cidades”, denuncia Del Río. “Para atender a súa comenencia electoral válelle todo, mesmo ignorar criterios obxectivos de reparto e penalizar aos concellos que goberna no medio rural”, engade.

“Este plan DTC93 é unha proba máis de como o PP castiga á xente que vive nos pequenos e medianos concellos condenándoos a ver como se lle suprimen cada vez máis servizos”, apunta o voceiro do BNG.

Ademais, os nacionalistas consideran que este reparto de fondos públicos imposto polo PP “é unha mostra máis de que as deputacións teñen que desaparecer, polo seu funcionamento antidemocrático e por rexirse por criterios clientelares que escapan ao control do pobo”.

Caixa de recursos audiovisuais e viveiro de empresas

Desde o BNG propoñen que se destine parte dos fondos deste plan da Deputación á adquisición de “unha caixa de recursos que poidan ser usados no Cine Alfonsetti e outras salas baleiras que ten o Concello de forma que poidan ser utilizadas polo Concello e as entidades”.

Ademais, os nacionalistas insisten na súa proposta de utilizar os fondos públicos que achega a Deputación para comezar o proxecto dun viveiro de empresas. Os nacionalistas, que xa levaron ao Pleno esta iniciativa, lamentan que o executivo do PSOE non a recollese para o Plan de Obras da Deputación.

“Vai sendo hora de que o goberno se tome en serio o desemprego e busque alternativas para os 1185 veciños e veciñas sen emprego”, indican. “O máis caro do proxecto sería o solar, pero o Concello xa ten solo no polígono de Piadela, só falta a vontade política de destinar os fondos públicos a xerar emprego e riqueza en lugar de estragalos en ocorrencias e eventos gastronómicos”, sinalan.