“O estacionamento en dobre fileira, sobre beirarrúas e vados e mesmo en prazas peonís como o propio Campo é unha constante desde que o PSOE entrou a gobernar, se non queren aplicar a ordenanza de tráfico que a derroguen”.

Betanzos, 4 de abril de 2014. O BNG demandou no Pleno que o goberno local adopte medidas para garantir o paso seguro de peóns no cruce das rúas Porta da Vila, Ferradores e Fonte de Unta. Segundo explicou a concelleira nacionalista María Otero, “había un paso de peóns, que está sen sinalizar e é practicamente invisíbel”.

Segundo os nacionalistas, a esta situación de escasa visibilidade do paso “axudan ademais os numerosos vehículos que estacionan día tras día nese entorno, complicando o paso dos peóns”. Por este motivo, desde o BNG ironizan se esta “é outra zona de párking express das que anuncia o goberno local”.

Desde o BNG, que recolleron queixas veciñais sobre este tema para levalas ao Pleno, engaden que “o pavimento de chapacuña precisa de continuas reparacións que sufragan os cartos da veciñanza”, polo que preguntaron ao executivo do PSOE se “estudou o goberno local a súa substitución”. Neste sentido, reclamaron do goberno local, que criticara o pavimento desa zona cando estaba na oposición, que concrete a alternativa escollida e os prazos que prevén para solucionalo.

“O estacionamento en dobre fileira, sobre beirarrúas e vados e mesmo en prazas peonís como o propio Campo é unha constante desde que o PSOE entrou a gobernar”, indica o voceiro nacionalista, Henrique del Río. Desde o BNG reclaman ao goberno local “que faga cumprir a ordenanza de tráfico ou a derrogue” porque “incumprir e facer gala de que se incumpre unha ordenanza ralla a prevaricación”.