Por terceira vez no actual mandato, o BNG volverá a propoñer no Pleno que se cree unha liña de bolsas para actividades extraescolares.

Betanzos, 23 de setembro de 2013. O BNG reclamará no Pleno que as bolsas que concede o Concello de Betanzos sexan repartidas segundo criterios de renda e non, como agora sucede, que cada solicitante perciba unha cantidade liñal sen ter en conta a súa situación económica. As bolsas para material escolar son de 80 euros por solicitante e “a contía da bolsa unha vez concedida non é progresiva, é a mesma sexa cal sexa a renda da persoa beneficiaria”, explican os edís nacionalistas Henrique del Río e María Otero.

“Esa axuda debera ser progresiva para garantir o acceso a maiores fondos por parte dos que menos teñen” indican desde o grupo municipal do BNG. Os nacionalistas cuestionan que, coas bases que se levan empregando anos, “o máximo de renda permitido para poder optar ás bolsas é demasiado baixo”.

A modo de exemplo, indican que “unha familia de dous pais e un cativo, poderían ter como máximo uns ingresos totais de 1170 euros mensuais para poder optar á axuda, senón están directamente excluídos”. “Isto quere dicir que un dos adultos non pode ter ningún tipo de ingresos, porque senón supera a renda máxima a partir da cal non pode optar á axuda” explican, e engaden que “a unha familia cun dos seus membros desempregado e sen ningún tipo de ingreso 80 euros non lle solucionan nada”.

“Con respecto ao pasado curso, no mes de agosto o goberno local do PSOE anunciou que incrementa os fondos, pero resulta que o máximo de renda para pedir estas axudas segue sendo o mesmo” aseguran Del Río e Otero. “As bases aprobadas polo goberno local do PSOE prevén que a cantidade sobrante non se reparte entre os solicitantes” censuran.

Os nacionalistas aseguran que utilizar como indicador da capacidade económica dunha familia a declaración da renda do ano anterior xenera distorsións. E cuestionan que, mentres nas bases do goberno local se puntúa o alugueiro da vivenda, “a hipoteca da vivenda habitual non desconta á hora de medir a renda”. “Os gastos na vivenda habitual deberan desgravar en calquera caso xa que é un ben básico”, aseguran.

Desde o BNG tamén cuestionan que o goberno do PSOE exclúa destas axudas aos escolares censados na localidade pero que acuden ao colexio fóra do termo municipal “sexa por motivos laborais ou de outra índole”. “E malia plans de igualdade propagandísticos, a orde de axudas non contemple a situación das vítimas de violencia machista” aseguran.

Propoñen que as axudas se establezan en función de criterios progresivos de renda e outros criterios sociais (vítimas de violencia machista, colectivos en risco de exclusión social, alumnado de Betanzos en centros públicos ubicados noutros concellos, contemplar a hipoteca da vivenda habitual, ...) en todas as bases de convocatorias municipais de axudas.

O BNG reclama de novo unhas bolsas para actividades extraescolares

Ademais, e por terceira vez no actual mandato, o BNG volverá a propoñer no Pleno que se cree unha liña de bolsas para actividades extraescolares. “A ser posíbel agora que comeza o curso, non vaia ser que o PSOE as convoque en agosto, como as de material escolar”, ironizou o voceiro nacionalista, Henrique del Río.