“Para sacar o lixo que enche o lavadoiro, que se acumula contra os muros e que acaba no cauce do río non fai falla máis que poñer un pouco de vontade”

Betanzos, 16 de xaneiro de 2015. O BNG reclamou ao goberno local do PSOE que limpe e manteña en condicións axeitadas o entorno da fonte dos Ánxeles, que presenta “un estado lamentábel”.

“En 2012 presentamos esta iniciativa no Pleno e, a pesar de que o PSOE respondeu que solucionara este problema, o certo é que a maleza ten comido boa parte do entorno e os desperfectos levan anos sen amañar”, indicou o voceiro do BNG, Henrique del Río. “En 2013 volvimos a reclamar que se reparase a fonte e o entorno e se limpase o lixo que se acumula alí e o PSOE volveu dicir que xa actuarían sobre a fonte cando fixesen o paseo pola beira do Mandeo até os Caneiros”, recorda o edil nacionalista.

“A recuperación da fonte dos Ánxeles e o seu entorno non está incluída no novo proxecto dese paseo faraónico á beira do Mandeo que pretende sacar adiante o goberno do PSOE”, engade o concelleiro do BNG. “E para sacar o lixo que enche o lavadoiro, que se acumula contra os muros e que acaba no cauce do río non fai falla máis que poñer un pouco de vontade”, lamenta.

Para o BNG, “a situación da fonte dos Ánxeles vai na mesma liña de deixadez en que se atopa o patrimonio do concello”, indican. “Continuamente recibimos queixas da veciñanza por estas situacións, que a pesar de boas palabras, o goberno local non atende”, insiste Del Río.

“Na mesma situación que a fonte dos Ánxeles están outras moitas fontes tradicionais, algunhas con valor patrimonial como a da Cangrexeira” , advirten. “En lugar de atender o patrimonio histórico e artístico que temos e que é o fai diferente a nosa cidade, o goberno do PSOE quere estragar máis de medio millón de euros en desmontes e pasarelas de madeira á beira do río”, cuestionan os nacionalistas.