“Xa denunciamos nunha ocasión no Pleno a falta de limpeza e os problemas de salubridade nas inmediacións e no propio edificio sindical, pero o goberno local do PSOE respondeunos que problemas de limpeza hai en moitos lugares de Betanzos e non fixo nada por solucionalo”.

Betanzos, 22 de febreiro de 2013. O BNG pedirá no Pleno que o Concello reclame ao Ministerio de Traballo o mantemento do edificio sindical, ubicado no parque Pablo Iglesias. Segundo trasladaron usuarios do edificio, “a falta de mantemento da cuberta provocou filtracións que ocasionaron diversos desperfectos no edificio pola caída do falso teito e as pingueiras, chegando a supor un perigo para os usuarios”.

As persoas que acoden ao edificio sindical advirten igualmente de que “o corredor e as escaleiras non teñen luz, e as fiestras e as portas están rotas”. Ademais, a falta de limpeza e mantemento do xardín e a beirarrúa provoca problemas de salubridade.

“Xa denunciamos nunha ocasión no Pleno a falta de limpeza e os problemas de salubridade nas inmediacións e no propio edificio sindical”, explicaron os nacionalistas, “pero o goberno local do PSOE respondeunos que problemas de limpeza hai en moitos lugares de Betanzos e non fixo nada por solucionalo”.

Segundo explican desde o BNG, todo isto provocou que o edificio este case sen uso e polo tanto “un empeoramento do servizo que os sindicatos emprestan aos nosos veciños e veciñas xa que as prestacións do edificio vense reducidas, imposibilitando que se impartan cursos de formación ou atendemento a problemáticas laborais”, chegando mesmo ao punto de que se estea dando “o servizo de asesoramento na rúa”.

Ademais, os nacionalistas reclaman un convenio que poña en valor os espazos sen uso dentro do inmoble, como a antiga cafetería ou as dependencias que deixou baleiras ACEBE. “Entendemos que sería un lugar que podería ter uso por parte da veciñanza se o Concello e o Ministerio chegaran a un acordo”, indicaron, “de feito temos constancia de que a asociaciación de veciños do barrio xa solicitou o uso deste local e incluso houbo algun tramite por parte do goberno local diante do Ministerio” . Por este motivo, o BNG reclama ao goberno local dea “pasos decididos decididos para chegar a un acordo co Ministerio que permita o uso veciñal dos espazos baleiros dun edificio construído con cartos de todos e todas”.

“Entendemos que non podemos consentir ter edificios que foron construídos con cartos públicos neste estado lamentabel mentras a asociación de veciños e veciñas da Madalena non ten local e os sindicatos atenden aos traballadores e traballadoras na rúa”, criticaron.