Del Río: “Os sucesivos gobernos locais reduciron tanto a calidade como a variedade na xa case inexistente oferta deportiva municipal”.

Betanzos, 18 de setembro de 2012. O BNG presentará no Pleno unha proposta para dinamizar o deporte de base. “No BNG entendemos necesario adaptar os recursos propios do noso Concello e os das outras entidades que están á nosa disposición a través de diferentes plans de promoción da actividade física e do deporte”, explicou Henrique del Río. “é preciso achegar un abano de actividades e infraestruturas deportivas que respondan ás necesidades e demandas de todos os veciños e veciñas”.

“Os sucesivos gobernos locais reduciron tanto a calidade como a variedade na xa case inexistente oferta deportiva municipal e a delegación total da xestión das principais instalacións deportivas nun sector privado que se aproveitou dunha situación de privilexiado monopolio para as deixar caer por un deficitario mantemento”, segundo o voceiro nacionalista, “provocando a diminución do número de actividades de xeito indiscriminado”.

Desde o BNG proponen realizar un labor de promoción do deporte escolar mediante escolas deportivas municipais en colaboración coas ANPAs, as asociacións deportivas e os clubes betanceiros. Así como, promover as actividades deportivas e recreativas para as persoas adultas e a 3ª idade dentro dun de saúde municipal.

“Consideramos que sería important editar unha publicación que recolla e promova o facer das asociacións, clubes e colectivos deportivos de Betanzos”, indicou o portavoz nacionalista, “que informaron que esta proposta lles foi trasladada polos clubes deportivos nas reunións que mantiveron para recoller suxerencias en relación cos orzamentos municipais”.

O BNG defenderá tamén a necesidade de impulsar a práctica e a difusión dos deportes tradicionais, recuperando espazos para a súa práctica e dándoos a coñecer nos eventos deportivos e nas escolas deportivas municipais.