“Mentres que a proposta do alcalde non marca prazos, a nosa proposta é instar á Xunta de Galiza a comprometer os fondos e os medios para que o aulario do Carregal abra as portas o vindeiro curso como colexio de educación infantil independente”

Betanzos, 27 de marzo de 2015. O BNG fíxolle chegar ao alcalde as súas propostas “para concretar e mellorar” a moción institucional que quere aprobar sobre o colexio. “Para o Bloque o tema do colexio é unha cuestión fundamental e irrenunciábel, así que evidentemente imos apoiar a moción institucional”, aseguroulle o voceiro nacionalista, Henrique del Río, por correo electrónico ao rexedor.

As propostas do BNG céntranse nos acordos que o alcalde propuxo ao resto dos grupos. “Sobre a exposición de motivos podiamos facer cincuenta mil apreciacións, porque houbo moitas máis mocións neste mandato que as que presentou o PSOE como grupo político, pero iso é o de menos” explicoulle Del Río. “Pedimos sempre unidade neste asunto e iso non vai ser, desde logo e pola nosa banda, impedimento” asegurou.

Os acordos que propón o alcalde son tan vagos e inconcretos que o mesmo PP pode apoialos sen problema porque non hai prazos nin melloras concretas, aínda que non fixese nada no vindeiro ano non o estaría incumprindo

Neste sentido, o alcalde quere “demandar a Consellería de Educación que o novo centro sexa declarado como colexio independente e non aulario” mais o BNG avogou por modificar o acordo marcando prazos para esta conversión. “Neste sentido a nosa proposta é instar á Xunta de Galiza a comprometer os fondos e os medios para que o aulario do Carregal abra as portas o vindeiro curso como colexio de educación infantil independente”, explicou o voceiro nacionalista Henrique del Río.

No mesmo sentido, o BNG avogou por concretar as “distintas melloras no Vales Villamarín; e se amplíe o número de docentes” que propón como acordo o alcalde por melloras concretas. “Desde o BNG pensamos que é necesario concretar que as melloras son mudar o tellado e fiestras do CEIP Vales Villamarín e incrementar o cadro de persoal consonte ao que ANPA e dirección veñen demandando”, indicou Del Río. “Coidamos que é importante facer a referencia a dirección e ANPA no propio acordo neste sentido” explicoulle Del Río ao alcalde, en base ás carencias que o actual colexio ten no “illamento térmico” e “no cadro docente”.

“Os acordos que propón o alcalde son tan vagos e inconcretos que o mesmo PP pode apoialos sen problema porque non hai prazos nin melloras concretas, aínda que non fixese nada no vindeiro ano non o estaría incumprindo”, explica o nacionalista. “O BNG vai apoiar a moción institucional de igual modo porque pensamos que é un tema fundamental e a unidade na defensa do ensino público e indispensábel para conseguir mellorar a situación, mais cremos que introducindo as nosas propostas queda moito máis concreta no tocante a demandas de medios, reparacións e prazos para termos como cidade o que nos corresponde en dereito”, asegura o voceiro do BNG.