Del Río: “non é a primeira vez que Betanzos ten problemas neste asunto, polo que consideramos que debe ser regulado”.

Betanzos, 19 de decembro 2012. O BNG presentou esta mañá unha moción solicitando a creación dunha comisión que redacte unha ordenanza reguladora da instalación de antenas de telefonía móbil. O voceiro nacionalista, que compareceu acompañado por veciños afectados pola instalación dunha antena en Viraventos, explicou que “queremos que os veciños poidan participar na elaboración desta ordenanza”.

O BNG lembrou que a ausencia de regulación neste tema só beneficia ás grandes empresas. “Nin Xunta nin Estado regulan a instalación das antenas e os Concellos fan o que consideran”, asegurou Henrique del Río, que recordou que “non é a primeira vez que Betanzos ten problemas neste asunto, polo que consideramos que debe ser regulado”.

“Está visto que se houbera trinta operadores, trinta antenas deixaba colocar o goberno local do PSOE en lugar de racionalizar a súa instalación”, ironizou. O voceiro nacionalista apelou ao sentido común e ao principio de precaución que recomenda a Unión Europea xa que “polo momento non está comprobado que as antenas de telefonía sexan nocivas para a saúde, pero tampouco está claro que non o sexan”. “Non deixa de ser chamativo que a ONU recomende colocar as antenas a unha certa distancia dos colexios”, explicou.

O BNG tamén aludiu ao impacto visual destas instalacións para defender unha regulación sobre a súa colocación. “O que non pode ser é que saian onde lles cadre como os cogumelos no outono”, ironizou.

“O alcalde asegura que estaría cometendo unha prevaricación de non conceder a licenza á antena de Viraventos”, lembrou Del Río. “Retamos ao alcalde, e que non dea a calada por resposta, a ver como lle chama a ter unha obra sen licenza diante dos fuciños e consentir que continúe a pesar das denuncias da veciñanza”. “O que non pode ser é que a un veciño se lle pare unha obra sen licenza, que está ben parada, pero que a unha grande empresa se lle consinta”, concluíu.