“Non se pode dicir unha cousa en xaneiro e outra agora”, afirmou o edil nacionalista para cuestionar a incoherencia do goberno local do PSOE.

Betanzos, 27 de xuño de 2012. O BNG manifestou onte no Pleno a súa oposición á suba das matrículas na escola infantil municipal que propuxo o goberno local do PSOE para aplicar o vindeiro curso escolar. O portavoz municipal do BNG, Henrique del Río, recordou que o goberno local criticou a suba de taxas nas escolas infantís da Xunta no Pleno de xaneiro, cando se debatía unha moción do BNG sobre este asunto, e que sen embargo onte propuña aplicar as mesmas subas que aprobou o goberno galego do PP.

“Non se pode dicir unha cousa en xaneiro e outra agora”, afirmou o edil nacionalista para cuestionar a incoherencia do goberno local do PSOE. “Menos mal que a ninguén lle resulta xa críbel que o PSOE vai facer unha política distinta á do PP vendo exemplos como este”, abundou.

Concretamente, os nacionalistas denuncian que o goberno local do PSOE propón subir de 110 a 160 euros a asistencia ás aulas, o comedor pasa de 30 a 70 euros, o uso esporádico do servizo de comedor duplica o seu custo e o custo da hora adicional de docencia pasa de 13,75 a 20 euros. “Unhas subas que complican moito a conciliación da vida laboral e familiar que pregoa o plan de igualdade do PSOE, que novamente se incumpre”, denuncian desde o BNG. “Aínda cos descontos previstos, a asistencia á escola infantil municipal custaralle o mesmo a unha familia que ingrese 1064 euros ao mes que a unha que ingrese máis de 3000 euros” indica o voceiro nacionalista, que retou ao goberno do PSOE a explicar se ve xusto isto.

O PSOE quere subir de 110 a 160 as aulas e de 30 a 70 euros o comedor

O BNG advertiu no Pleno, contra o indicado polo PSOE, que a suba de taxas aprobada pola Xunta en xaneiro afecta ás escolas infantís que dependen do goberno galego ou do Consorcio de Benestar. “A escola infantil de San Francisco é municipal e esta orde non lle afecta”, advirten desde o BNG, que cren que “o goberno local sube as taxas e bótalle a culpa á Xunta para derivar as súas responsabilidades ao PP”. “E no caso de que houbese unha orde de axudas da Xunta que invade as competencias municipais, en lugar de tragar con ela o que debe facer o goberno local é recorrela onde procede”, concluíu.

O BNG informará ás persoas afectadas pola suba

Por este motivo, os nacionalistas opoñeranse á suba do custo das matrículas na escola infantil que propón o PSOE e iniciarán unha campaña informativa para achegar ás persoas usuarias da mesma esta información.