“Incúmprense os dous contratos e o lóxico é rescindir os dous contratos”

“Agora falta ver se é certo que comezan a asumir as súas responsabilidades porque aínda agardamos dimisións por este asunto”

Betanzos, 30 de marzo de 2015. O BNG manifestou a súa satisfacción porque “por fin conseguimos, despois de dous anos, que o PSOE lle dea unha solución á situación do Hotel San Roque”. Segundo manifestou o voceiro nacionalista, Henrique del Río, “por fin, e logo de remitir nós o asunto á Fiscalía hai meses, o goberno do PSOE decidiu cumprir o acordo do Pleno e mandar toda a documentación á Fiscalía para determinar quen os os responsábeis desta situación”.

“Agora falta ver se é certo que comezan a asumir as súas responsabilidades porque aínda agardamos dimisións por este asunto” relatan os nacionalistas. “E falta que o alcalde permita á comisión de investigación analizar por que a administración municipal se desentendeu, por completo e durante anos, de vixiar que Complejo San Roque cumprise os seus contratos co Concello”, engadiu. “Porque hai responsábeis de non conceder a licenza e de non vixiar o cobro dos tributos, e de permitir esta situación durante anos”, relata.

“Estamos esperanzados de que se comece a poñer unha solución a este conflito, agora cando o PSOE teña a ben pode poñerse tamén a solucionar o escándalo da ORA e explicarnos como vai o reconto dos tiquets da ORA un por un”, ironizou o voceiro nacionalista.

Con todo, desde o BNG recordan que “Complejo San Roque incumpre os dous contratos que ten co Concello, o do hotel que está pechado e o do estacionamento soterrado que non abriu”. “Incúmprense os dous contratos e o lóxico é rescindir os dous contratos”, puntualizan os nacionalistas. “O PSOE terá que aclarar por que os mesmos incumprimentos son abondo para anular un contrato e por que no outro caso só lle tira das orellas á empresa”, engadiu o voceiro nacionalista. “Ou é que xa hai quen está disposto a xestionar o hotel e non se nos informa aos grupos da Corporación de algo máis?”, pregúntase.