Del Río: “Parece mentira que a voceira do PP, médica de profesión, defenda este tipo de medidas inhumanas sen ningún problema ético”.

Betanzos, 11 de novembro de 2013. O BNG pediu ao PP que “recapacite a súa postura en favor do copago farmacéutico”. Os nacionalistas lamentan que “o PP quere que os veciños e veciñas con enfermidades crónicas, teñan que pagar polos seus medicamentos”.

“Con estas políticas o PP está deseñando un auténtico imposto sobre a enfermidade”, advertiu o voceiro municipal do BNG, Henrique del Río. Os nacionalistas cuestionan que coas decisións do goberno español “haberá saúde para quen poida pagala, e condenan aos que menos teñen ao sufrimento e incluso a morte”.

Desde o BNG lamentan que o PP defendese no Pleno durante dous meses o copago farmacéutico que o goberno de Rajoy e de Feijoo queren aplicar no noso país. “Parece mentira que a voceira do PP, médica de profesión, defenda este tipo de medidas inhumanas sen ningún problema ético” indicou o voceiro do BNG. “O goberno central do PP decide deixar sen sanidade gratuíta a unha parte da poboación, o goberno galego do PP consínteo ao non exercer as competencias de Galiza e unha médica, que xurou consagrar a súa vida ao servizo da humanidade e colocar como primeira das súas preocupacións a saúde e vida dos doentes, respaldao”, denuncia. “Parece que máis que un xuramento hipocrático a señora Faraldo fixo un xuramento hipócrita”, ironizan.

O PSOE ten que dar pasos adiante para cumprir a moción do BNG e que asuma o copago o Concello se a Xunta insiste en aplicalo

Os nacionalistas lembran que o PP tamén respaldou a retirada da cobertura sanitaria ás persoas desempregadas de longa duración. “Deberían antepoñer o dereito á saúde da veciñanza por riba da obediciencia cega ao goberno de Rajoy”, insisten.

Desde o Bloque solicitan tamén ao goberno local do PSOE “que dea pasos adiante para cumprir a moción do BNG para que o Concello asuma o copago en todos os casos”. “Dada a gravidade do asunto e a importancia que ten para a veciñanza, deberían darse a mesma ou máis présa que cando anunciaron que ían cubrilo coa ordenanza de emerxencia social sabendo que era imposível”, demandan. “O goberno do PSOE debería demostrar con feitos que asume o denominado ‘Espírito de Riotorto’ e pasar da retórica aos feitos”, indican.

O BNG reclamou tamén que a Xunta se faga cargo do comedor escolar e garanta a súa gratuidade

Os nacionalistas reclamaron tamén ao PP que reconsidere a decisión de impoñer o copago nos comedores escolares. “Escoiten ás ANPAs que reclaman ao goberno galego que asuma os servizos sociais que emprestan as ANPAS”, reclamou Del Río. “O goberno galego desenténdese do comedor escolar de Betanzos e dá unha achega modesta para que outros se fagan cargo das súas obrigas”, recordou o voceiro nacionalista. “Se polo PP é, Betanzos queda sen comedor escolar porque primeiro a ANPA e logo o Concello tiveron que facerse cargo das obrigas da Xunta”, indicou. “Parécenos bastante reprobabel que solicite ao Concello 15 000 euros mentres a Xunta non se fai cargo dun servizo que lle correspondería xestionar”, lamentou.

“Na actual crise económica é moi inxusto que a Xunta obrigue ás familias a pagar polo comedor escolar, cando moitas veces non teñen elección, e polos medicamentos”, advirten os nacionalistas. “Un domicilio no que só entre a axuda familiar de 426 euros ao mes verase obrigado a escoller entre a saúde ou darlle de comer aos seus fillos”, denuncian.