“Este local público podería ter moitos usos, pero está cedido todo o ano sen que se lle aplique o regulamento de uso dos locais sociais nin a ordenanza fiscal de aluguer da aula de cultura ou o salón azul”.

Betanzos, 2 de xaneiro de 2014. O BNG reclamou ao goberno local do PSOE que aclare “de que forma está feita” a cesión da metade da planta alta do Edificio Arquivo, onde “está instalado durante todo o ano e desde hai moitos anos un Belén, ocupando a metade da planta superior, nunha superficie similar á da Aula de Cultura”.

Os nacionalistas instaron ao executivo local a aclarar se a esta cesión se lle aplicou “nalgún momento a taxa de aluguer de salas culturais” e se “poden cederse instalacións municipais a particulares para uso permanente”.

Desde o BNG exixen, ademais, ao goberno do PSOE que aclare se é seguro desde o punto de vista da Protección de Datos, o feito de que un particular teña as chaves do edificio que é sede da administración municipal onde están depositados infinidade de datos sensíbeis da veciñanza”.

O Bloque denuncia que en agosto de 2012 preguntou exactamente o mesmo e a resposta do goberno local do PSOE foi que esta instalación “leva ocupando ese espazo varios anos” e que “estudarase un posíbel traslado para dispoñer do espazo”. “Obviamente, aquí o goberno do PSOE non estudou nada e sigue todo igual”, explica o voceiro nacionalista, Henrique del Río.

“Este local público podería ter moitos usos, pero está cedido todo o ano sen que se lle aplique o regulamento de uso dos locais sociais nin a ordenanza fiscal de aluguer da aula de cultura ou o salón azul”, explicou o voceiro do BNG.

“O goberno local do PSOE non garante que toda a veciñanza teña acceso en igualdade de oportunidades aos locais e equipamentos construídos con cartos de todas e todos”, asegurou o voceiro do BNG, Henrique del Río. Os nacionalistas insisten en que a actitude irregular do goberno local xera “un agravio entre entidades e colectivos ao aplicar o regulamento a uns si e outros non” e ten provocado incluso “problemas de relación entre a veciñanza”.

“Son locais que todos e todas mantemos e, polo tanto, todos temos dereito a usalos e para iso están. Non ten sentido investir un montón de cartos nuns locais e que despois non se faga nada para que teñan actividade e queden baleiros ou case sen uso”, indicou o voceiro do BNG.