“Se o PSOE quere chegar a algún tipo de acordo non pode ser desde a ocultación e a mentira. O primeiro paso debe ser facer públicos os datos reais e explicalos e dar a cara diante da nosa veciñanza”.

Betanzos, 24 de outubro de 2013. O BNG mostrouse disposto a falar co PSOE sobre a modificación das ordenanzas fiscais e a intentar chegar a acordos polo ben dos veciños e veciñas. “Desde o BNG estamos encantados de que se poidan ter en conta algunhas das nosas propostas, que xa fixemos públicas, porque entendemos que beneficiarían á maioría da nosa veciñanza”, indicou o voceiro do BNG Henrique del Río. “Claro que chegar a acordos é mais doado se hai intención, e ocultar datos ao BNG non parece precisamente unha mostra de que o goberno do PSOE teña intención de chegar a acordo ningún”, apuntou.

O voceiro nacionalista replicou ao goberno local do PSOE que “cando aseguramos que non se cobra a taxa dos caixeiros en 2012 é porque así o di a conta xeral”. “Se a conta xeral non recolle fielmente os gastos e ingresos do Concello nas súas correspondentes partidas e os datos van onde lle peta ao goberno e non a onde teñen que ir, o resultado é que só o goberno sabe como gasta ou ingresa”, indica. “Isto tradúcese en opacidade, en ocultarlle á veciñanza que fai o PSOE cos cartos de todas e todos”, asegura.

“A falta de transparencia do goberno local na xestión de recursos públicos é scandalosa, é por certo xusto o contrario do que prometeron cando chegaron ao goberno”, criticou del Río. “Igual nos debían enviar unha táboa de en que concepto contabilizan cada gasto e ingreso na conta xeral, porque como imos saber se os ingresos por transportes especiais aparecen, poñamos o caso, en gastos de persoal?”, ironizou.

Os nacionalistas insistiron en que aínda así os datos que o goberno fixo públicos onte non son os que corresponderían á aplicación da taxa, por certo igual que sucede coa taxa de transportes especiais. “O goberno local di que ingresou 960 euros por catro caixeiros, cando o establecido son 248,16 por cada caixeiro, se fas a conta o ingreso xa terían que ser 992, 64 euros”, criticou o portavoz nacionalista, “a non ser que os 30 euros que faltan vaian contabilizados na taxa do guindastre”.

“O mesmo sucede coa taxa polos transportes pesados que cruzan o centro da cidade, polo que ingresaron 80 euros cando o tipo mínimo son 170, non entendemos que taxa están aplicando”, insistiu. “En calquera caso, calculando a suba do IPC no 0.3 por cento o que o PSOE propón subir a cada entidade financeira serían 0.78 euros. Non sabemos se cos beneficios multimillonarios que están tendo os bancos grazas as ‘axudas’ públicas poderán asumir esta subida”, ironiza.

No tocante á taxa do Conservatorio, os nacionalistas aseguran que “non se pode pretender financiar o servizo a costa unicamente dos usuarios e usuarias”. Desde o BNG insisten en que se debe mancomunar “un servizo que de feito xa é comarcal” e reclaman ao alcalde do PSOE que “igual que convoca aos alcaldes da comarca para pedir máis forzas de seguridade, o faga para garantir servizos educativos na comarca”.

“O PSOE non pode pretender que as familias asuman a parte que Xunta e Deputación deixan de financiar do Conservatorio”, aseguran. “O ensino formal ou non formal non se pode avaliar en termos de beneficio económico, é un servizo e polo tanto o goberno local ten a obriga de asegurar que non hai unha discriminación para acceder por razón da renda”, aseguran desde o BNG.

Os nacionalistas exixiron ao PSOE toda a información sobre as subidas que planean levar a cabo nas taxas e que deixen de manipular os datos para intentar enganar a veciñanza. “Se o PSOE quere chegar a algún tipo de acordo non pode ser desde a ocultación e a mentira”, explicou del Río, “o primeiro paso debe ser facer públicos os datos reais e explicalos e dar a cara diante da nosa veciñanza”.