Nas instalacións do centro educativo poden atoparse desde restos de obra ciscados polo chan ata papeleiras deterioradas e desbordadas de lixo. "Non se recorda un inicio de curso coma este".

Betanzos, 16 de setembro de 2009. O BNG vén de denunciar o “deplorable” estado de limpeza no que se atopan as instalacións do CEIP Vales Villamarín neste inicio de curso, recollendo as queixas de múltiples membros da comunidade escolar e educativa. A organización nacionalista denuncia que nas instalacións do centro educativo poden atoparse desde restos de obra ciscados polo chan ata papeleiras deterioradas e desbordadas de lixo.

A situación é de tal calibre que moitos dos usuarios do centro educativo non recordan, en palabras dos concelleiros nacionalistas, “un comezo de curso caracterizado por unha falta tan notoria de limpeza e mantemento”.

O goberno local ten a obriga de limpar e manter as instalacións do colexio

Os nacionalistas recordan ao goberno municipal as súas obrigas na limpeza e mantemento do CEIP Vales Villamarín e exixen unha pronta solución a uns problemas que, coma os relacionados coa gardería, poderían terse evitado cun mínimo de previsión por parte da Alcaldía e as concellerías competentes de PP e CxB.

Os representantes frontistas cuestiónanse que “se cadra os concelleiros de PP e CxB estiveron demasiado ocupados en festas e romarías durante este último verán”.

Desde o BNG inscriben esta situación dentro do “alarmante descenso da calidade dos servizos públicos” emprestados pola entidade local, á par que relacionan isto co “caótico inicio do curso escolar” que se está dando en toda Galiza pola desatención do ensino público desde o PP.