“Alguén do PP terá que explicar por que estivo o edificio baleiro e rematado máis de dous anos”.

Betanzos, 13 de maio de 2013. O BNG lamentou que a comitiva de Feijóo tentase expulsar do acto de inauguración do albergue de peregrinos de Betanzos aos edís nacionalistas por levar camisolas de apoio ás persoas estafadas coas participacións preferentes. “É un auténtico escándalo que unha protesta simbólica, totalmente pacífica e silenciosa reciba por parte do PP unha resposta desmesurada que pisotea os máis elementais dereitos”, censurou o voceiro do BNG, Henrique del Río.

“Resulta que hai persoas afectadas pola estafa das preferentes en Betanzos, que María Faraldo lles prometeu nas eleccións amañarlles o problema e as deixou tiradas e non podemos botarlle en cara a Feijóo que o seu goberno as abandonase”, indican os nacionalistas. “O PP quixo abusar da excusa da seguridade para tentar sacar ao BNG dun edificio amañado cos cartos de todas e todos”, reprochan. Os nacionalistas agradecen tamén a solidariedade amosada por PSOE e CxB diante do intento de censura ao que foron sometidos.

Desde o BNG lamentan ademais que a Xunta comunicase ao Concello a visita de Feijóo só cunha hora de antelación, segundo a información que transmitiu o propio alcalde. “Por algo será que Feijóo se ten que andar agachando do pobo ao que di representar”, ironizou Del Río.

Os nacionalistas celebran que vaia abrir o albergue. “É unha noticia que levamos agardando máis de dous anos, desde que remataron os traballos no edificio”, indican. “Alguén do PP terá que explicar por que estivo o edificio baleiro e rematado máis de dous anos”, insisten. Con todo, desde o BNG reiteraron a súa demanda de que se modifique o regulamento dos albergues para que poidan acoller puntualmente a persoas sen fogar que durmen na rúa. “O PP dixo no Pleno que o regulamento non se podía modificar, abandonando a xente á súa sorte”, recordan.

“Agardamos que este investimento sirva para algo e se lle dea un uso, non como outros dispendios que todos coñecemos en Betanzos, como o cine, o estudo da radio ou a famosa biblioteca infantil da que agora o PP fai bandeira”, concluíron.

Os nacionalistas anunciaron que, á vista de que o albergue xa conta con persoal, pedirán explicacións no Parlamento de como se produciron estas contratacións xa que non houbo ningún concurso público. “Hai 1274 persoas sen emprego en Betanzos e non se sabe como aparecen traballadores no albergue”, indican.