O pasado día 20 o goberno anunciou nos medios de comunicación a contratación inmediata de persoal, cando xa rematara o proceso para a elaboración das novas listas de substitución, mais a realidade é que aínda a día de hoxe seguen sen contratar persoal

Betanzos, 1 de febreiro de 2016. O BNG-Asembleas Abertas reiterou, de novo, no Pleno a necesidade de cubrir as baixas na escola infantil municipal. “Desde o pasado mes de setembro a escola infantil municipal padece unha importante carencia de persoal”, explicou o voceiro do BNG-Asembleas Abertas, Henrique del Río. O edil nacionalista recordou que o seu grupo “ven denunciado esta situación desde entón, pleno tras pleno”.

“Hai dúas semanas a situación agravouse aínda máis, se cabe, ao producirse outra baixa máis, que obrigou á escola a funcionar cun cadro de persoal moi minguado: agora mesmo a escola infantil conta con dúas persoas menos das que debera”, indicou o voceiro nacionalista. Desde o BNG-Asembleas Abertas cuestionan que o pasado día 20 o goberno anunciase nos medios de comunicación a contratación inmediata de persoal, cando xa rematara o proceso para a elaboración das novas listas de substitución. Porén, “a realidade é que aínda a día de hoxe seguen sen contratar persoal”, lamentou Del Río.

“Non entendemos porque o goberno local minte á veciñanza dicindo que se van cubrir as baixas inmediatamente e unha semana despois segue sen contratar persoal”, criticou o portavoz do BNG-Asembleas Abertas. “Esta situación provoca un prexuízo para as menores escolarizadas e para o persoal que traballa no centro, ademais de expoñer ao Concello a unha sanción da Xunta por incumprir a normativa no tocante ao número de alumnas por docente”, advertiu.

Servizo de limpeza

O BNG-Asembleas Abertas denunciou que tampouco contrataron persoal para o servizo de limpeza municipal como anunciaron no mesmo comunicado. “Manteñen o servizo parcialmente privatizado, a pesar do acordo plenario do mes de setembro de contratar persoal e manter a xestión pública do servizo”, informou Del Río, “a metade do Vales, o aulario e todos os edificios municipais estanse limpando a través dunha empresa privada”.