Será mañá xoves desde as sete da tarde, coa participación de Carme Adán.

As nacionalistas non acuden ao acto organizado esta mañá polo goberno local: “non podemos participar da farsa hipócrita de quen ten a obriga de defender os dereitos das mulleres e non o fai”

Betanzos, 25 de novembro de 2015. O BNG-Asembleas Abertas celebrará mañá as 19:00 h. na libraría Biblos, en Betanzos, co título “Feminicidio: visibilizar, denunciar, erradicar”. O acto contará coa presenza de Carme Adán, deputada do BNG no Parlamento galego e candidata de Nós-Candidatura Galega ao Congreso por Pontevedra.

As leis contra a violencia de xénero, tanto a estatal como galega, iniciaron pasos moi importantes cun marcado carácter penal e xudicial, polo que unha muller vítima de violencia machista é obrigada a acreditar a súa situación a través dunha denuncia para acceder a orde de protección. Desde o BNG-Asembleas Abertas consideramos que este extremo debe ser modificado introducindo unha figura que mellore a lei co termo “feminicidio” mostrando que a violencia machista é “unha cuestión política e social” porque a violencia contra as mulleres é un “terror específico” polo que propoñemos o “Estatuto da vítima de Feminicidio”.

Este termo evidencia a dimensión política que presenta o asasinato e morte de mulleres como un dos ataques máis graves contra os dereitos humanos a súa integridade moral e liberdade e, por outra, unha dimensión social que sinala aos factores de discriminación social que conflúen nas mulleres converténdoas en especialmente vulnerábeis aos ataques contra a vida.

Este estatuto de vítima de feminicidio terá que garantir un acompañamento efectivo ás e incidir na dimensión social do problema e nos mecanismos que a nivel psicolóxico, económico e social poden acompañar á unha muller que sofre violencia machista. Con este obxectivo consideramos necesario incluír un título propio na lei de prevención contra a violencia machista no que se defina as formas para acreditar a situación de violencia sen ter que agardar por unha orde do Ministerio Fiscal.

O BNG-AA non participa no acto “hipócrita” convocado este mediodía polo goberno local

“A violencia machista combátese con plans e programas, destinando recursos a atallar todas as manifestacións do machismo; non se combate con xogos florais o 25 de novembro”, aseguran desde o BNG-Asembleas Abertas. Por este motivo, indican, “decidimos non avalar coa nosa presenza o exercicio de cinismo do PSOE e o PP, que esta mañá fixeron unha pantomima teatral contra a violencia de xénero porque é o día de facelo e queda politicamente correcto, cando o resto do ano as súas políticas van no sentido contrario”.

Non podemos participar da farsa hipócrita de quen ten a obriga de defender os dereitos das mulleres e non o fai

“O BNG-Asembleas Abertas non pode participar da farsa hipócrita de quen ten a obriga de defender os dereitos das mulleres e non o fai”, advirten as nacionalistas. “Ao goberno local do PSOE éncheselle a boca falando de igualdade tal día como hoxe, pero despois non a practica nin dentro do propio Concello”, denuncia o voceiro nacionalista, Henrique del Río.

“Nin se dispuxeron fondos para o plan de igualdade, nin se retirou o financiamento do Concello a actos sexistas como a raíña das festas ou as carrozas con mulleres prácticamente espidas do entroido”, repasa a modo de exemplo. “E iso que o PSOE di que está en contra da obxectualización das mulleres”, lamenta.