“Pedímoslle ao señor alcalde que cumpla inmediatamente a moción que se aprobou hai unha semana no Pleno sobre este asunto”

Betanzos, 5 de agosto de 2015. O BNG-Asembleas Abertas denunciou que os edificios municipais están quedando sen servizo de limpeza por falta de persoal, despois de que a limpadora que se encargaba de cubrir 13 edificios collese as vacacións. “Pedímoslle ao señor alcalde que cumpla inmediatamente a moción que se aprobou hai unha semana no Pleno sobre este asunto”, indicou Henrique del Río, voceiro do BNG-Asembleas Abertas.

“A situación do servizo de limpeza é insostíbel e require unha solución inmediatamente”, asegura o edil nacionalista. “Actualmente só están a limpar o CEIP Vales Villamarín coa única persoa que queda no servizo de limpeza”, denuncian desde o BNG-Asembleas Abertas.

“O que non pode ser é ter 13 edificios con xente traballando alí e sen limpar, sen sequera baleirar as papeleiras, porque son unhas condicións de traballo que non son as axeitadas e mais ben antihixiénicas”, engade o voceiro nacionalista. “Polo que sabemos o goberno local do PSOE non fixo nada por solucionar o tema, desde que se aprobou a moción non houbo ningunha xuntanza para buscar saída a este problema que provocou o propio PSOE ao despedir ás persoas que estaban traballando na limpeza do aulario”, asegura Del Río.

O BNG-Asembleas Abertas asegura que “hai un sistema legal para cubrir estas baixas que é tirar da lista de substitucións e que foi o que se aprobou no Pleno”. Polo tanto, reclaman ao goberno local “que non castigue á veciñanza e as empregadas do Concello cunhas condicións de limpeza nos edificios que nin sequera se achegan ao desexábel”.

Desde o BNG-Asembleas abertas informan de que se o goberno local non toma medidas esta situación prolongarase, cando menos, até o 1 de setembro que remataría o periódo de vacacións. “A maiores, no mes de setembro empeza a actividade nos centros educativos e queremos pensar que o goberno local terá previsto que pensa facer de cara ao futuro”, concluíu o voceiro nacionalista Henrique del Río.