Desde o BNG-Asembleas abertas reiteramos o noso compromiso na defensa dos servizos públicos e de calidade no noso Concello e o noso apoio ás xustas reclamacións do persoal municipal. Está comprobada que a xestión directa dos servizos públicos, sen empresas privadas subcontratadas, garante unha mellor calidade do servizo e resulta máis barato de emprestar ás administracións. Ademais de proporcionar empregos de calidade fronte as condicións precarizadas das empresas privadas.

Ao igual que fixemos nos últimos catro anos, dende o BNG-Asembleas abertas, faremos todo o que estea na nosa man para mellorar o funcionamento dos servizos públicos e conseguir avanzar na resolución dos graves problemas que co seu persoal ten históricamente o Concello.

Neste sentido queremos trasladar o noso apoio ao comité de empresa diante do desmantelamento e privatización do servizo de limpeza e insistir en que, ao igual que fixemos os pasados anos faremos todo o que estea na nosa man para defender os postos de traballo e evitar o desmantelamento dos servizos públicos.

Esixiremos ao goberno local do PSOE, que se cubran as baixas e as prazas vacantes no servizo de limpeza do Concello, xa que non hai ningún impedimento legal para contratar persoal nun servizo básico coma este. Reclamaremos tamén que se manteñan as condicións laborais das persoas que quedan traballando no servizo de limpeza, que viron como se lles suprimían dereitos como a conciliación familiar que tiñan concedidos despois de múltiples iniciativas plenarias do BNG na anterior lexislatura.

Desde o BNG-Asembleas abertas queremos, polo tanto, trasladar todo o noso apoio ao comité de empresa e a todo o persoal do concello, especialmente ás persoas que traballan no servizo de limpeza, e mostrar toda a nosa disponibilidade para trasladar ao Pleno da corporación iniciativas en defensa deste servizo.