“O goberno do PSOE volve outra vez ás prácticas dos tempos en que o PSOE tiña maioría absoluta, poñendo ao servizo do seu grupo político unha administración e uns medios que teñen que estar ao servizo de todos os veciños e non da propaganda do goberno”.

Betanzos, 4 de maio de 2012. O BNG acusou no Pleno ao goberno do PSOE de facer un “uso partidista” dos medios municipais. Neste sentido, o portavoz municipal do BNG, Henrique del Río, fixo alusión a unha nota sobre emendas do PSOE aos orzamentos do Estado, dado que “na web municipal o pasado 17 de abril publicábase unha nova segundo a cal o goberno local presentaría no Senado emendas aos orzamentos do Estado”. “Que representación ten o goberno local no Senado?”, preguntou o edil nacionalista para denunciar que en realidade o anuncio é dunhas emendas do PSOE e que “o sitio de facer tal anuncio é a web do PSOE e non a do Concello de Betanzos”.

Unha situación parecida deuse tamén no perfil oficial da Oficina Municipal de Información Xuvenil na rede social twitter. “O pasado 28 de marzo no perfil oficial da OMIX apareceu publicado un enlace a un acto da UGT” indicou Del Río, que explicou que “o día antes, ocorreu o mesmo con dous enlaces das Xuventudes Socialistas” e mentres tanto “non se publicou cousa algunha de outros sindicatos ou agrupacións políticas e uns días despois cambiouse o nome de dito perfil”.

Por ambos motivos, e tirando de ironía, o portavoz municipal do BNG preguntou ao goberno do PSOE “A quen hai que enviarlle as notas para que aparezan publicadas no perfil da OMIX e na web do Concello?”.

Non é a primeira vez que o BNG denuncia o uso partidista por parte do PSOE dos medios de comunicación municipais. O pasado mes de decembro o BNG denunciou que “o goberno local publicou na web municipal novas relativas ás mocións do PSOE, que non son cousas do Concello, senón dun partido”.

O BNG denuncia que con este proceder, “o goberno do PSOE volve outra vez ás prácticas dos tempos en que o PSOE tiña maioría absoluta”, advirte Del Río, que acusa ao goberno local de “poñer ao servizo do seu grupo político unha administración e uns medios que teñen que estar ao servizo de todos os veciños e non da propaganda do goberno”.