“Solicitamos copia de diversa documentación e as respostas veñen sendo a opinión do alcalde sobre os mesmos”.

Betanzos, 19 de xuño de 2012. O BNG exixiralle no Pleno ao alcalde que lle dea acceso á documentación necesaria para exercer o seu traballo de control ao goberno. “Solicitamos copia de diversa documentación e as respostas veñen sendo a opinión do alcalde sobre os mesmos”, indica o voceiro nacionalista, Henrique del Río, que se pregunta se o goberno do PSOE de ter algo que ocultar á vista desta actitude.

Un destes casos sería a solicitude de copias dos contratos das empresas que efectuaron traballos de xardinaría e mantemento de espazos públicos para o Concello. A resposta do alcalde, no canto de achegar copia dos contratos ou autorizar o acceso aos mesmos, foi “en canto aos contratos de xardinería, obras e mantemento son encargos menores cumprindo coa lei de contratos das Administracións Públicas”. “Desde o BNG non queriamos dubidar en ningún momento que fosen de acordo coa lexislación, pero queremos nós mesmos ter acceso á documentación e non nos fai falla a opinión do alcalde”, ironiza o voceiro nacionalista.

"O mesmo tipo de respostas que criticaban ao PP cando estaba na oposición agora dánolas o PSOE desde o goberno"

Outro caso similar deuse cando o BNG solicitou copia do proxecto de rehabilitación do lavadoiro das Cascas, anunciado publicamente polo goberno local do PSOE. A resposta do goberno local, que non achega a documentación solicitada, di “comunícolle que o que se fixo foi unha memoria-proxecto de restauración do lavadoiro (...) para arranxar o máis urxente. (...) Se nos conceden a subvención, veríamos a forma de acometer esta inversión por contratación externa ou se o permite a axuda, mediante a contratación de persoal polo propio Concello”. “Novamente non nos dan acceso á documentación solicitada, neste caso supoñemos que será porque non existe”, apuntan os nacionalistas.

Para o BNG, o goberno local do PSOE amosa “un pouso autoritario” ao negar información aos veciños. “Esta falta de transparencia no que ten a ver cos cartos públicos parécenos máis propia de outros tempos”, indica Del Río, que lle recorda a Ramón García que el criticaba o mesmo cando gobernaba o PP.

As respostas nos Plenos, outra mostra de opacidade

Na mesma liña, censuran a falta de transparencia do executivo do PSOE á hora de responder ás preguntas que a oposición formula nos plenos. “O mesmo tipo de respostas que criticaban ao PP cando estaban na oposición agora dánnolas a nós desde o goberno”, recrimina Del Río, que asegura que con esta actitude “calcada da dereita” o goberno local “dificulta a función de control do goberno que ten que exercer a oposición”.