O BNG-AA insiste a readmisión da traballadora do servizo de limpeza e a xestión directa do servizo

O BNG-AA insiste a readmisión da traballadora do servizo de limpeza e a xestión directa do servizo

bng-aa azulDel Río: “Acumulan alegremente condeas por despedimento improcedente porque total pagámolas as veciñas”

A cantidade total prevista nos orzamentos para servizos servizos xestionados pola empresa privada ascende a 830 033,07 euros

Betanzos, 12 de abril de 2016. O BNG-Asembleas Abertas reclamou ao goberno local do PSOE a readmisión da traballadora despedida do servizo de limpeza que ven de custar ao Concello unha nova condena por despedimento improcedente e que reverta a situación de privatización do servizo. “A pesar de ter apoiado un acordo plenario que defendía xusto o contrario no mes de xullo, o goberno local do PSOE segue coa súa ansia privatizadora”, explicou o voceiro nacionalista, Henrique del Río. “En lugar de readmitir á traballadora despedida ilegalmente prefire indemnizala con cartos de todas nós”, denuncia.

“Levamos máis dun ano pedindo ao goberno local información sobre a empresa que o Concello ten contratado para realizar a limpeza nos edificios municipais, pero aínda non nola facilitaron a pesar de uqe o prazo legal para darnos este tipo de información son cinco días” engadiu Del Río. “Polo que sabemos, a empresa foi contratada ‘a dedo’ sen concurso público e non sabemos canto nos está costando nin que tipo de contrato ten” relata. “O PSOE non nos facilitou absolutamente ningún dato, pero é que cando fumos ao negociado de contratación, os propios funcionarios tampouco tiñan coñecemento disto” engade.

En resposta ás declaracións nos medios de comunicación do concelleiro de persoal, o portavoz nacionalista ironizou “acabamos de ir ao concello a pedir o informe que lles impide emprestar un servizo básico como a limpeza mediante xestión directa e lles obriga a privatizalo”. As nacionalistas mostráronse indignadas por este proceder do goberno do PSOE, que tachan de “hipócrita” por dicir defender os servizos públicos e mesmo apoiar os acordos plenarios e facer todo o contrario.

“Nos últimos 4 anos o goberno do PSOE privatizou o servizo de xardinaría, o cemiterio e a limpeza e pretenden evitar a súa responsabilidade” relata o edil nacionalista. “É certo que hai unha lexislación estatal que restrinxe a contratación de persoal, mais os problemas continuos de falta de persoal e despedimentos improcedentes non os vemos no resto de concellos aos que afecta a mesma lexislación, polo que é obvio que algunha responsabilidade terá o goberno local”, engadiu Del Río.

As nacionalistas censuran a “irresponsabilidade” do goberno local. “Acumulan alegremente condeas por despedimento improcedente porque total pagámolas as veciñas”, denuncian. “Os cartos que se van nas indemnizacións que o mal goberno do PSOE provoca non van a servizos para todas, e polo tanto, terá que asumilos do seu patrimonio quen lle provoque o dano ao Concello”, engade.

Privatizacións na proposta de orzamento

Desde o BNG-Asembleas Abertas informaron tamén que todas estas privatizacións teñen reflexo na proposta de orzamento que lles trasladou o goberno. “Sete mil euros figuran directamente en partidas para a privatización do servizo de limpeza, mais a cifra pode superarse porque poden cargarse facturas de limpeza a calquera partida de gasto corrente”, explica Del Río.

De feito, indica que a cantidade total prevista nos orzamentos para servizos servizos xestionados pola empresa privada ascende a 830 033,07 euros “unha cifra que segue medrando ano tras ano mentres se van desmantelando os servizos públicos”, explicou o voceiro nacionalista. “Nós seguimos defendendo que a xestión directa é máis eficiente, máis barata e de mellor calidade e evita corruptelas na xestión dos servizos” conclúe.

O BNG-AA insiste a readmisión da traballadora do servizo de limpeza e a xestión directa do servizo