Desde o BNG-AA insisten en que cos máis de 87 000 euros do contrato que oferta o goberno local “poderían contratarse varios xardineiros máis se o servizo precisa reforzo”.

Betanzos, 27 de febreiro de 2016. O BNG-AA cuestionou no Pleno a privatización do servizo de xardinería anunciada esta semana polo goberno municipal do PSOE. O edil nacionalista Henrique del Río indicou que “na relación pública de empregos do Concello figuran catro prazas de xardineiro e, a pesar das xubilacións, o Concello aínda conta con 5 operarios neste servizo, entre o persoal adscrito e o do GRUMIR readmitido e reubicado neste servizo”.

As nacionalistas consideran, polo tanto, que o mantemento dos xardíns e macetas do municipio pódese facer con medios propios. “Haberá que organizar o traballo do servizo e formar ao seu persoal e se fai falta contratar persoal contratalo mais pensamos que a opción de seguir privatizando os servizos do Concello é máis cara e funciona peor que a xestión directa por persoal municipal”. Desde o BNG-AA insisten en que cos máis de 87 000 euros do contrato que oferta o goberno local “poderían contratarse varios xardineiros máis se o servizo precisa reforzo”.

Del Río demandou ao goberno local que aclare “por que motivo se opta pola privatización do servizo” ademais advertiu que “ no borrador de orzamentos non hai partida suficiente no programa de parques e xardíns para pagar esta privatización”.

Non é normal nin supón un aforro privatizar un servizo cando xa existen 5 xardineiros no cadro de persoal

Para as nacionalistas “tan escandaloso como a privatización do servizo tendo xardineiros é que o PSOE o anuncie como algo normal”. Explican que “co que nos custan todos estes contratos de privatización, os servizos municipais poderían estar cubertos con persoal propio, o que repercute na creación de empregos de calidade e na economía local”.

Desde o BNG-Asembleas Abertas advirten que esta nova privatización segue os pasos que o goberno do PSOE deu antes con servizos como a limpeza viaria e de edificios municipais, o cemiterio ou as obras de mantemento viario. “Nos xardíns o PSOE estivo dando contratos a dedo durante anos para evitar o concurso público, ao igual que no cemiterio ou na reparación das rúas”, denuncia Del Río, que recorda que a Intervención municipal censura esta maneira de contratar do goberno local.

Ademais, desde o BNG-Asembleas Abertas pregúntanse polo futuro que lles agarda aos cinco xardineiros que mantén no cadro de persoal o Concello. “Se unha empresa privada vai facer o seu traballo, non sabemos que farán estes traballadores, se o PSOE pretende reubicalos noutros servizos ou se o que pretenden é despedilos, mais estaría ben que o aclarasen”, conclúen.