Ana Miranda participou nun encontro con produtores da comarca para recoller as súas demandas de cara á aprobación da nova Política Agraria Común (PAC). 

Betanzos, 16 de maio de 2019. O BNG comprometeu a posta en marcha dun centro de transformación agropecuario de carácter comarcal para xenerar valor engadido á producción agrogandeira das Mariñas. Nun encontro con representantes dos sectores produtivos, as nacionalistas puxeron en valor esta proposta destinada a “xenerar postos de traballo e riqueza na comarca a partir do enorme potencial que temos”.

“Se temos o ferrado máis pequeno do país é precisamente porque temos a mellor terra do país e temos que facer diso unha oportunidade de futuro”, explicou o candidato nacionalista en Betanzos, Henrique del Río. Desde o BNG avogan por garantir terra agraria para quen queira producir.

“Nun momento no que o mercado demanda variedades diferentes, sabores orixinais e produtos distintos temos que tirar partido de vivirmos nunha comarca que ten máis de media ducia de variedades autóctonas de horta” engadiu o nacionalista. “E garantir a conservación do solo agrario para horta e para dar maior dimensión á producción do Viño de Betanzos”, engadiu.

As nacionalistas desgranaron outras propostas como poñer en funcionamento feiras de produtos ecoloxicos e de proximidades nos distintos concellos da comarca e apoiar ás pequenas empresas produtoras. “Hai que ordenar o territorio e tender a un aproveitamento multifuncional do monte”, explicou a eurodeputada e candidata do BNG ao Parlamento Europeo, Ana Miranda.

Os problemas dos produtores de horta coa Política Agraria Común (PAC)

Ana Miranda explicou a postura do BNG diante da nova Política Agraria Común. “O BNG non pode dar o seu apoio a un documento que esquece aos agricultores galegos e só atende aos grandes terratenentes”, destacou Ana Miranda- “O BNG ten que estar alí, porque se vai aprobar definitivamente na vindeira lexislatura, e se queremos defender ao sector, ten que haber unha voz galega, libre e sen tutelas” engadiu.

A dicir da candidata do BNG, este modelo só servirá “para perpetuar un modelo agrícola insostible, que fai desaparecer explotacións agrícolas no noso país e que non atende as súas necesidades”. Critica asemade que o novo documento non contemple a posta en marcha de medidas que respecten a biodiversidade e garantan a protección do medio ambiente, que beneficien a Galiza, pois o modelo de agricultura que se apoiou hoxe dende a Eurocámara provoca o avance do impacto do cambio climático.
Por outro lado, segundo Ana Miranda, a reforma da PAC non beneficia a pequenos e medianos produtores, a inmensa maioría dos produtores galegos, xa que gran parte dos fondos da PAC se destinan “ás grandes explotacións e a quen ten a terra sen traballala”. Esta distribución de fondos, ao seu xuízo, “perpetúa as desigualdades, producindo enormes desequilibrios e prexudican enormemente á agricultura galega”.