Del Río: “Varias persoas contáronnos que estiveran dando voltas polos camiños sen ter claro que pista coller. E os días tan cortos desta época do ano e as chuvias destas semanas aínda engaden máis problemas”.

Betanzos, 16 de xaneiro de 2014. O BNG reclamou ao goberno local do PSOE que sinalice o camiño de San Xiao e Armea xa que a veciñanza dos Ánxeles ten que empregar estas pistas para acceder aos seus domicilios e garaxes debido ás obras que se desenvolven na rúa. “Varias persoas contáronnos que estiveran dando voltas polos camiños sen ter claro que pista coller” indica o voceiro nacionalista, Henrique del Río, que engade que “os días tan cortos desta época do ano e oas chuvias destas semanas aínda engaden máis problemas” á veciñanza.

Para o BNG, “os traballos podían terse programado dun xeito moito menos molesto para a veciñanza”. Denuncian que a obra permaneceu parada todas as pontes festivas do Nadal, “lóxico porque os traballadores teñen dereito a ter días libres” pero que “o goberno local debería ter previsto isto e actuar para minimizar as molestias á veciñanza garantindo un acceso medianamente normal ás vivendas e garaxes”.

Ademais, advirten, “comprometeuse seriamente a seguridade da veciñanza ao ter cortada toda a rúa cando se podía ter deixado habilitado un carril”. “Por onde ía pasar unha ambulancia ou un camión de emerxencias coa maquinaria aparcada no medio da rúa e a calzada totalmente aberta?”, pregúntanse.

Os nacionalistas lamentaron que o goberno do PSOE tardase máis de 15 días en autorizarlles a consulta do expediente da obra. “Pedimos o cronograma dos traballos e o plan de emerxencias para propoñer melloras que fixesen máis levadeiras as obras á veciñanza e atopámonos cunha actitude obstruccionista por parte do goberno local”, lamentan desde o BNG. “Demoraron quince días a resposta e en lugar de darnos o que pedimos, obrígannos a remexer en todo o expediente”, explicou Del Río.

“A falta de información á veciñanza é unha queixa que recollemos a diario”, indica o voceiro nacionalista. “É como se con que a empresa puxer dous carteis prohibindo o paso a vivendas e garaxes durante todo o día todas as obrigas do Concello estivesen xa cumpridas”, explica. “De feito, tivo que ser o BNG quen informase a veciñanza e negocios da rúa en que ían consistir exactamente as obras”, asegurou, explicando que os nacionalistas remitiron un boletín informativo antes de que comezasen os traballos.

“O PSOE cansouse de criticar ao PP hai catro anos, cando abriu toda a avenida Jesús García Naveira dunha vez incrementando os prexuízos da obra para a veciñanza pero agora está a facer exactamente o mesmo e sen informar á xente”, advirten os nacionalistas.

Problema engadido de tráfico co estacionamento indebido

Ás molestias das obras no entronque da rúa da Cañota coa dos Ánxeles, a veciñanza ten que padecer o estacionamento indebido que o goberno locald o PSOE tolera no primeiro tramo da rúa dos Ánxeles. “O PSOE ten que aclararlle á veciñanza por que permite estacionar no entorno do antigo Cine Capitol obstaculizando o tránsito e dificultando o acceso aos garaxes da zona e ao treito baixo da rúa”, indican.