Os nacionalistas lamentan que o PP faga críticas sen achegar ningún tipo de solución, como demostra o estado das casas da Xunta. “Propuxemos crear un banco de locais comerciais, que cremos que pode recuperar a actividade económica no Casco Histórico”.

Betanzos, 17 de outubro de 2013. O BNG lamentou que o goberno local do PSOE non adoptase ningún tipo de medida para frear o deterioro do Casco Histórico. “Chegaron ao goberno prometendo actuacións subsidiarias nas casas que ameazan caer e permiten, coa súa inacción, que a especulación urbanística continúe destruíndo o Casco Histórico”, recorda o voceiro do BNG, Henrique del Río.

“O PSOE ten exactamente a mesma política do Casco Histórico que tiña o PP: ningunha”, aseguran os nacionalistas. “Manteñen as rúas peonís cheas de vehículos mal estacionados, eliminaron o mobiliario urbano do Casco e como todo investimento, parchean o pavimento”, indican.

“Por toda medida para o Casco Histórico presentaron unha moción para reclamarlle á Xunta que amañe as casas que comprou en 2011 para facerlle a campaña electoral ao PP”, indican desde o BNG. Del Río lembra que o PSOE gastou 15 000 euros do orzamento en facer tres proxectos para a Xunta, sen estar obrigado a facelo, “cartos que o goberno do PSOE tiña que ter investido en rehabilitar ou dinamizar o Casco Histórico”.

O BNG denuncia que PSOE e PP evade nas súas responsabilidades na situación actual do Casco Histórico. “Quen gobernou 30 anos na Xunta e 30 anos no Concello evaden as súas responsabilidades”, asegura Del Río. “Os que nada fan, discutindo cos que non fixeron nada para ver quen fixo menos mentres o Casco Histórico cae a cachos”, resume.

O BNG lamenta que as dez casas da Xunta estean “condeadas a caer ano tras ano” porque “o PP non ten vontade de amañalas, só de usar o Casco Histórico contra o goberno local”. “O PP fixo electoralismo con cartos públicos coa compra das vivendas do Casco Histórico, usándoas na súa campaña das municipais” recorda. “Prometeron a súa rehabilitación como vivendas sociais para gañar votos cos cartos de todas e todos”, censuran.

Para os nacionalistas, PSOE e PP fan “un paripé e declaracións retóricas” pero demostran que “PP e PSOE son iguais e non teñen intención de facer polo Casco Histórico nada que non sexan promesas en campaña electoral”. “O resultado é que o Casco Histórico continúa caendo a cachos”, advirten.

Desde o BNG lamentan que o PP se limite a facer críticas sen achegar ningún tipo de solución, como demostra o estado das casas da Xunta. “Vender fume si, crítica destrutiva tamén, pero facer propostas non se lle dá ben á dereita”, ironizan.

Os nacionalistas reclaman ao goberno local do PSOE que repoña os bancos, macetas, papeleiras e demais mobiliario urbano da zona histórica para humanizala e que garanta a seguridade dos peóns retirando os vehículos dos espazos peonís. Ademais, instan ao executivo a impulsar a extensión das redes de fibra óptica e gas no Casco Histórico, xa que “non pode ser que non se ampliasen desde que o BNG saíu do goberno local hai sete anos”.

“Propuxemos crear un banco de locais comerciais, que cremos que pode recuperar a actividade económica no Casco Histórico”, indica Del Río. “Non sabemos por que o PSOE non fai nada con isto a pesar de que respaldou o acordo no Pleno”, engade.

Esta mesma semana, os nacionalistas propuxeron que o Plan de Obras da Deputación servise para financiar a rehabilitación do tímpano da porta da Ribeira e para mellorar as prestacións da escola infantil municipal, ubicada en San Francisco.

Respaldo á marcha polo emprego da CIG

O BNG sumouse esta tarde á marcha a pé polo emprego que desenvolve a CIG, dentro da campaña enfocada a pór no centro do debate social e institucional o grave problema do desemprego e as medidas que se deberían adoptar para enfrontalo. O portavoz municipal do BNG, Henrique del Río, xunto a voceiros, dirixentes e militancia do BNG das Mariñas, cubriu a distancia entre o polígono do Espírito Santo e a praza do Campo.

O BNG apoia a campaña emprendida pola CIG, que presentou un paquete con 100 propostas para a creación do emprego e o estímulo da economía, iniciativas que será trasladadas ao Parlamento de Galiza en forma de Iniciativa Lexislativa Popular.