O BNG insiste en que se desconten as taxas da piscina mentres estea pechada

O BNG insiste en que se desconten as taxas da piscina mentres estea pechada

“Xa trouxemos estas queixas con anterioridade, manifestando o goberno local que xa amañara o problema. Por que, daquela, volve a xente a queixarse desta situación?”

Betanzos, 4 de abril de 2013. O BNG trasladou ao Pleno as queixas dun grupo de persoas usuarias da piscina e o complexo deportivo municipal. Segundo estas persoas, as instalacións permaneceron pechadas durante a pasada Semana Santa “pero se lles cobra o mes completo”.

Os usuarios e usuarias do complexo deportivo municipal tamén se queixan, advertiu o BNG, “de que non recibiron ningún tipo de información sobre a suba de taxas que aprobou o goberno local no Pleno”. Os nacionalistas opuxéronse a esta suba porque “en tempos de crise non se pode cargar na veciñanza para que a empresa concesionaria manteña a marxe de beneficios”.

“Xa trouxemos estas queixas con anterioridade, manifestando o goberno local que xa amañara o problema”, lembraron os nacionalistas no Pleno. “Por que, daquela, volve a xente a queixarse desta situación?” cuestionaron ao goberno do PSOE. Os nacionalistas exixiron que se lle poña solución a esta situación o antes posíbel para evitar maiores prexuízos á veciñanza.

Desde o BNG recordan que o pasado 22 de febreiro de 2011 o Pleno aprobou unha moción do BNG que solicitaba, entre outras cousas, que non se cobrase as cotas correspondentes a outro período de peche da piscina. Entre os grupos que apoiaron a proposta nacionalista figuraba o PSOE, actual goberno. Por este motivo o voceiro do BNG, Henrique del Río, reclamou ao goberno local “que por unha vez teña coherencia entre o que dixo e o que fai” e adopte as medidas que faga falta “para cumprir ese acordo” ou que aclare “por que non cumpren cos acordos plenarios que apoian”.

O BNG insiste en que se desconten as taxas da piscina mentres estea pechada