O BNG denuncia que o PSOE minte para subir os prezos da escola infantil de San Francisco
O PSOE en Sada dixo que a suba de taxas nas escolas infantís da Xunta non era de aplicación ás escolas municipais, pero en Betanzos sostén o contrario para enganar á veciñanza e evadir a súa responsabilidade diante dunha suba desproporcionada.
Betanzos, 4 de xullo de 2012. O BNG reclamou ao PSOE coherencia entre o que predica e o que fai alí onde goberna. O voceiro municipal do BNG, Henrique del Río, reprochou que en Betanzos o goberno do PSOE pretende subir as taxas da escola infantil municipal mentres en municipios da contorna onde está na oposición critica subas análogas.
Non é de recibo que mentres o PSOE na Coruña acusa ao PP de recortes sociais e de afogar a economía das familias por subir as taxas das escolas infantís municipais, en Betanzos pretendan impoñer unha subida aínda maior, advirte. Ademais, Del Río censura que o PSOE en Sada dixo que a suba de taxas nas escolas infantís da Xunta non era de aplicación ás escolas municipais, pero en Betanzos sostén o contrario para enganar á veciñanza e evadir a súa responsabilidade diante dunha suba desproporcionada.
Por este motivo, o BNG exixirá que o goberno local que aclare se o PSOE mentiu noutras localidades ou se minte en Betanzos para levar adiante a súa subida de prezos na escola infantil municipal, logo de que o goberno local propuxera ao Pleno subir os prezos na escola de San Francisco. O goberno local do PSOE afirmou que o decreto de suba de taxas nas escolas infantís da Xunta obriga a esa subida nas escolas infantís de titularidade municipal, cousa que o propio PSOE nega noutros concellos.
Nin o PSOE nin o PP se preocupan polos problemas reais da veciñanza e só se dedican a encerellarse entre eles, advirten os nacionalistas, que acusan a ambos grupos de dicir unha cousa ou a contraria segundo estean no goberno ou na oposición. Proba disto, a dicir do BNG, é que o PP na Xunta pregoa austerizar na contratación de empregados públicos, mentres que agora no Concello de Betanzos demanda que se cubran as baixas do persoal. O mesmo PP que alí onde goberna abusa dos contratos negociados- aqueles nos que se convida a un número de empresas a facer unha oferta sen concurso público á que todas poidan concorrer- critica no Concello de Betanzos que o PSOE faga o mesmo, advirten os nacionalistas.
O BNG está a desenvolver unha campaña informativa para trasladar aos afectados a suba dos prezos que pretende levar adiante o goberno do PSOE na escola infantil municipal, ubicada nas escolas de San Francisco.