O BNG cuestiona que o PSOE promova un plan de igualdade mentres mantén a raíña das festas

O BNG cuestiona que o PSOE promova un plan de igualdade mentres mantén a raíña das festas

Os nacionalistas reclaman que o plan teña reflexo orzamentario e un cronograma de execución e que non sexa só un titular de cara ao 8 de marzo, dia internacional da muller.

Betanzos, 29 de febreiro de 2012. O BNG denunciou onte no pleno a contradición do PSOE ao promover un plan de igualdade que busca nos seus obxectivos “combater valores sexistas” mentres o propio goberno local promove actos que espallan este tipo de valores. “Entendemos que con este plan están a suprimir a figura da raíña das festas e que van destinar os case 20 000 euros que lle custa ao Concello a financiar a aplicación do plan de igualdade”, ironizou o concelleiro do BNG Xosé Vales.

Os nacionalistas insisten en que “non se pode dicir que se combaten os valores sexistas e á vez defender a raíña das festas”, polo que convidan ao PSOE a aclarar se en aplicación do Plan de Igualdade aprobado onte van a “suprimir esta figura machista e clasista”.

O BNG entende que o Plan nace cunha eiva importante de participación. “Se o obxectivo é que a sociedade asuma a igualdade, o plan tiña que ser participativo desde a súa elaboración”, aseguran os nacionalistas. Neste sentido, reclamaron no pleno “unha comisión formada por sindicatos, grupos políticos, asociacións e colectivos” para seguir a súa aplicación.

O BNG tamén pediu incluír entre as medidas concretas do Plan a organización de cursos de galego para mulleres inmigrantes. “A proposta do PSOE prevé organizar cursos de español pero esquece deliberadamente o idioma propio de Galiza, que aínda é de uso maioritario en Betanzos”, denuncia o portavoz municipal do BNG, Henrique del Río.

Segundo os nacionalistas, o debate plenario evidenciou que o plan “foi feito ás presas para aprobar de forma oportunista de cara o 8 de marzo, Día Internacional das Mulleres”. Neste sentido os nacionalistas reclaramaron tamén un cronograma para a súa execución e por suposto agardan que este plan teña reflexo no futuro orzamento do Concello. “Sería unha pena que a única intención do goberno do PSOE fora ter un titular para esa data e esquecer a aplicación do plan e avanzar na igualdade o resto do ano”, apuntou o concelleiro nacionalista Xosé Vales.

O BNG cuestiona que o PSOE promova un plan de igualdade mentres mantén a raíña das festas