“Coas beiras dos camiños tal e como están, cheas de broza que invade as calzadas, é practicamente imposible gardar as distancias de seguridade que indican as autoridades sanitarias”

Betanzos, 8 de maio de 2020. O Bloque Nacionalista Galego anunciou esta mañá que proporá ao Goberno municipal a habilitación de zonas de xogo pintadas nas beirarrúas na cidade para as crianzas.

O voceiro nacionalista, Henrique del Río, explica que “cos parques pechados, estas zonas de xogo farían máis agradábel a hora de desconfinamento das crianzas no centro urbano”. Explica que a iniciativa permite que as nenas “poidan brincar de maneira segura ao aire libre”.

Destaca que a iniciativa se puxo en marcha polas nacionalistas desde o goberno municipal de Lugo e contou con notable éxito. “Fai máis amábel as beirarrúas do centro, co cal é unha iniciativa que se pode manter no tempo, porque ofrece vantaxes en todo momento”, abunda o edil do BNG.

“Cos parques infantís pechados, ofrece unha alternativa sobre o formigón das rúas, pero cando reabran, tamén permiten avanzar cara unha cidade para os nenos”

 

Entende, ademais, que o custo da proposta é “moi modesto”. “Cos parques infantís pechados, ofrece unha alternativa sobre o formigón das rúas, pero cando reabran, tamén permiten avanzar cara unha cidade para os nenos”, puntualiza, "adecuando prazas e espazos onde sexa posíbel reservar un recanto para as crianzas sen impedir o tránsito, beirarrúas cun ancho abondo".

Limpar os camiños da zona rural próxima á cidade para garantir distanciamento

As nacionalistas demandaron ao goberno local, ademais, que limpe urxentemente os camiños da zona rural, nomeadamente os que lindan coa propia cidade. “Estes días están a saír moitas persoas, escollendo pasear polos camiños, ben por evitar xente, ben por pisar natureza”, destaca Del Río.

“Coas beiras dos camiños tal e como están, cheas de broza que invade as calzadas, é practicamente imposible gardar as distancias de seguridade que indican as autoridades sanitarias”, explica o voceiro nacionalista. “Acontece en zonas moi concorridas, como o camiño de San Xiao, Caraña ou a Veiga, mais tamén polo Coto ou A Acea” engade.

“Se urxe sempre ter limpos os camiños para poder utilizalos con seguridade, canto máis nunha situación onde debemos gardar distancias con quen se cruce connosco”, abunda.