Os nacionalistas volveron a facer “un chamamento a todas as persoas boas e xenerosas a se implicar neste proceso para desaloxar do goberno local ao PP e ao PSOE”.  As carencias do transporte público, un dos temas que máis preocupan á veciñanza, irán ao Pleno do martes.

Betanzos, 29 de setembro de 2014. O BNG celebrou o pasado sábado unha asemblea aberta nos Soportais da Cañota que contou coa asistencia de varias ducias de persoas e na que tivo lugar un interesante debate sobre a situación en que se atopa Betanzos. A raíz do conflito desatado pola Xunta ao reconverter o novo colexio de educación infantil en aulario ou os recortes na sanidade chegouse á conclusión de que moitos dos problemas que padece Betanzos teñen solución a un nivel distinto ao local, polo que fai necesario que exista un proxecto nacional.

Con todo, moitas das intervencións coincidiron en que Betanzos chegou á situación actual porque as forzas que a gobernaron- PSOE e PP- non teñen un modelo de cidade para servir á veciñanza. A veciñanza denunciou o abandono que sofren os diferentes barrios que se atopan as aforas da nosa cidade, como a Madalena ou Saavedra Meneses.

A veciñanza mostrou a súa preocupación sobre diversos temas como a calidade do servizo da auga, ou o saneamento, xa que moitos núcleos rurais aínda carecen deste servizo. Os veciños e veciñas existentes mostráronse partidarios de evitar que estes servizos sirvan para facer negocio unha empresa privada e para repetir casos de enchufismo de afíns ao goberno. No mesmo sentido, varias persoas cuestionaron tamén o modelo da ORA, advertindo que “a zona azul púxose á vez que o estacionamento soterrado do Campo, para pagar por aparcar na cidade”. Ademais de outras preocupación como o reparto de subvencións realizado polo goberno local do PSOE, en función de criterios que non son obxectivos.

Os problemas do transporte público acapararon grande parte do debate, desde o tren até o servizo de autobús. Neste sentido, xunto á actualización das paradas e a necesaria revisión das frecuencias, entendíase necesario algún servizo no interior do propio Concello. “Varias persoas do rural queixábanse de que todos os actos do Concello son no Campo e en horas ás que se lles obriga a tirar man de vehículo particular”, explica o voceiro nacionalista, Henrique del Río.

Os nacionalistas valoraron positivamente esta experiencia de contacto directo coa veciñanza que lles trasladou as súas preocupacións e propostas. “No BNG levamos varios anos facendo asembleas abertas, mais sempre vinculadas a problemas veciñais concretos como a gasolineira que querían construír na Madalena, a antena de Viraventos ou para recoller propostas para os diferentes orzamentos”, indicou Del Río, “mais esta é a primeira convocada para coñecer as preocupacións e propostas dos nosos veciños e veciñas e valorámola moi positivamente”.

Os nacionalistas e as veciñas e veciños asistentes decidiron darlle continuidade a esta asemblea para seguir falando das problemáticas das diferentes parroquias e barrios do noso Concello e para recabar propostas para conseguir “mudar o Concello”. Neste sentido os nacionalistas volveron a facer “un chamamento a todas as persoas boas e xenerosas a se implicar neste proceso para desaloxar do goberno local ao PP e ao PSOE”.