Betanzos, 30 de marzo de 2025. O BNG reclamou novamente no pleno o amaño do Lavadoiro das Cascas. O concelleiro do BNG Salvador González lembrou que “no mes de xuño do pasado ano, no BNG expresabamos o malestar da veciñanza e das persoas que visitan Betanzos polo estado do Lavadoiro das Cascas”. 

“Máis alá do feito de este estar pechado ao público de maneira habitual, chama a atención o lamentábel estado que presenta: pintadas en todos os muros, suciedade, restos de comida e de cartóns etc” abundou o edil nacionalista, que botou en falta que o goberno local do PSOE dedique a este edificio singular “a atención e o mantemento integral que merece”

Por este motivo, o concelleiro do BNG Salvador González solicitou ao goberno local do PSOE que leve a cabo “labores de limpeza e de adecuación do edificio do Lavadoiro das Cascas” e que se abra ao público o edificio, para poder ser visitado pola veciñanza e as persoas que se acheguen á localidade. “É un edificio único e telo pechado priva a moita xente de coñecelo”, concluíu.