Betanzos, 13 de xullo de 2023.- O BNG preguntará no pleno do vindeiro día 20 sobre o Globo, as previsións de construción e lanzamento, facéndose eco da alarma social sobre o tema. “Estamos moi preocupadas pola falta de información oficial con respecto á demora no inicio dos traballos de construción do Globo e pensamos que o goberno local ten que aclarar o antes posíbel se hai algún retraso ou problema con respecto ao lanzamento do Globo para atallar os rumores que se estenderon nas últimas semanas por Betanzos”, explicou a portavoz do BNG, Amelia Sánchez. 

“Hai uns días pedimos xa por rexistro toda a documentación sobre a subvención concedida á Fundación do Globo para coñecer se se pagou o do pasado ano ou non, porque non hai información oficial e os rumores son moi diversos”, abunda a voceira do BNG.

Desde o BNG indican que “o globo é un dos embaixadores da nosa cidade, unha tradición que nos une a todas as betanceiras e, precisamente por iso, o goberno local ten que informar á veciñanza con transparencia absoluta”. “Queremos deixar claro fronte a rumores “malintencionados” que o BNG, como non podía ser doutra maneira, defende unha mostra do noso patrimonio cultural como é o Globo de Betanzos”, engadiu Sánchez.

Neste sentido, lembran que precisamente para dar maior transparencia e información á veciñanza, o pacto de investidura subscrito polo BNG co PSOE recolle que na representación do Concello na Fundación do Globo estean representados todos os grupos da Corporación.