Betanzos, 21 de abril de 2021. O BNG insistirá no Pleno na cesión do edificio do antigo ambulatorio e a construción dun centro de día público en Betanzos. “Hai dezaseis anos que se inaugurou o novo ambulatorio de Betanzos e quedou dispoñíbel para un novo uso público o edificio do antigo centro de saúde”, explicou a portavoz do BNG, Amelia Sánchez. 

“Na actualidade, case 20 anos despois, Betanzos segue sen ter unha soa praza de centro de día público e a nosa comarca só 15 prazas no concello de Miño. Mentres un edificio público na zona urbana de Betanzos leva décadas pechado sen uso e polo tanto cada vez nun peor estado de conservación”, engadiu. “Este edificio segue sendo propiedade do Estado, que a pesar dos múltiples anuncios do PSOE local se segue negando a cedelo para darlle un uso público”, criticou a portavoz nacionalista.

“Desde o BNG de Betanzos vimos solicitando desde hai anos a cesión e rehabilitación do edificio do antigo ambulatorio, que responde as necesidades espaciais e de adaptación para as persoas con mobilidade reducida. Esta infraestrutura dotaría á veciñanza de Betanzos e da nosa comarca dunha prazas públicas de centro de día moi necesarias, contribuiría a dinamizar a rúa Pintor Seijo Rubio e evitaría que seguise o deterioro do edificio que hoxe ocupa o Instituto da Seguridade Social”, insistiu Amelia Sánchez. 

Promesas incumpridas do PP no goberno da Xunta

“Na campaña electoral na Feijoo acadou a presidencia da Xunta, o actual presidente prometera dotar dun centro de día público todos os concellos que superasen os 5 000 habitantes. Non obstante, ano tras anos a poboación foi testemuña da negativa da Xunta de Galiza para facilitar esa apertura e dotar o noso municipio dun servizo sumamente necesario para a correcta atención ás persoas dependentes e para a conciliación da vida familiar e laboral”, lembrou a portavoz nacionalista. 

Por todo isto desde o BNG pedirán que o Pleno inste ao Ministerio de Inclusión, Seguridade Social e Migracións a negociar a cesión do edificio do antigo ambulatorio de Betanzos á Xunta de Galiza para a apertura dun centro de día público.