Del Río: “É unha tomadura de pelo prever que se constrúe un colexio con 100 000 euros”

Del Río: “É unha tomadura de pelo prever que se constrúe un colexio con 100 000 euros”

“Feijóo e o PP fixaron varios prazos para iniciar as obras e acordaron coa dirección do colexio e a ANPA incrementar o número de alumnos por aula porque no curso 2013-14 ía haber un novo centro escolar”.

Betanzos, 2 de xaneiro de 2013. O BNG considera “unha tomadura de pelo” que o PP só conte con 100 000 euros nos orzamentos da Xunta para construír o novo colexio de educación infantil de Betanzos. “Deste asunto lévase falando desde que o BNG impulsou a expropiación dos terreos no ano 2007 e o PP é o culpábel de que haxa silveiras onde xa tiña que haber un colexio en funcionamento”, recorda o voceiro nacionalista, Henrique del Río.

O BNG apoiará calquera medida de presión que os pais e nais decidan levar adiante para exixir que se garanta a calidade do ensino e a construción do colexio

“O CEIP Vales Villamarín é o colexio máis masificado de toda Galiza e as políticas de recortes do PP fan que esta situación vaia a peor”, indicou o portavoz do BNG. “Feijóo e o PP fixaron varios prazos para iniciar as obras e acordaron coa dirección do colexio e a ANPA incrementar o número de alumnos por aula porque no curso 2013-14 ía haber un novo centro escolar”, reprochou Del Río, “e agora toda a veciñanza pode comprobar que as promesas do PP quedaron en nada”.

“Os recortes do PP están masificando as aulas e empeorando a calidade do ensino público”, asegurou o edil nacionalista, “como toda a veciñanza pode comprobar a pesar das mentiras de Feijóo e o PP”.

O Vales Villamarín é o colexio máis masificado de toda Galiza

Esta mañá tivo lugar no Concello unha xuntanza para analizar o proxecto do novo colexio, “que precisaría dun orzamento superior aos 3 millóns de euros e ao que o PP destina só 100 000”. O BNG lamenta que como toda medida de presión diante da Xunta, o alcalde e o goberno local do PSOE só contemplen “a enésima carta pedindo un favor e outra declaración institucional baleira”.

O BNG trasladou este serán á ANPA Brigantium do CEIP Vales Villamarín a súa disposición a trasladar este problema ao Parlamento de Galiza e exixir do goberno galego do PP que cumpra os compromisos que Feijóo adquiriu na campaña electoral. Ademais, tamén apuntaron que os nacionalistas secundarán calquera medida de presión que os pais e nais decidan levar adiante para exixir que se garanta a calidade do ensino e as infraestruturas precisas para isto.

Os orzamentos da Xunta esquécense de novo do Casco Histórico de Betanzos

O BNG calificou de “indignante” que o PP contemple só 100 000 euros para rehabilitar as 11 vivendas que a Xunta comprou e mais as que foron aceptadas pola Xunta como doazón no Casco Histórico de Betanzos. “Supoñemos que será para poñer un valo diante de cada unha e que os cascallos non caian sobre a xente porque esta cantidade, a verdade é que para moito máis non dá”, ironizou o portavoz do BNG.

O pasado ano o BNG presentou unha emenda aos orzamentos na que reclamaba 250 000 euros para “comezar a darlle volta á situación do Casco Histórico”. “Non entendemos por que seguen a aceptar doazóns de vivendas cando as van manter na mesma situación en que se atopan actualmente”, cuestionan os nacionalistas.

Del Río: “É unha tomadura de pelo prever que se constrúe un colexio con 100 000 euros”