“Cantos tickets levan contabilizados até o de agora? Onde se están a contar? Que persoal municipal o está a facer? Cando estiman finalizar este reconto?”

Betanzos, 23 de decembro de 2014. O BNG trasladou de novo ao Pleno a situación en que se encontra a concesión da ORA e preguntou no Pleno polo reconto dos tiquets. En febreiro e abril o Pleno debatiu unha moción do BNG para suprimir a ORA dado que non ingresa nada ao Concello desde hai anos. “A empresa concesionaria non ingresou un só euro no concello desde hai 7 anos e o concello non fai nada para obrigarlle a pagar. Se fose un veciño xa lle terían embargado a conta”, criticou Henrique del Río, portavoz do BNG.

“A postura do goberno local para manter a situación actual foi afirmar que os técnicos municipais estaban contando “’un por un’ os tíckets da ORA para coñecer a recadación efectiva e tomar decisións” lembra o voceiro nacionalista, Henrique del Río. “Sen embargo van dez meses desde que denunciamos a situación desta concesión e non se adoptou ningún tipo de medida para corrixila”, engade.

“Cantos tickets levan contabilizados até o de agora?” preguntou con retranca o edil do BNG ao goberno local. “Onde se están a contar? Que persoal municipal o está a facer? Cando estiman finalizar este reconto?” proseguiu.

“Levan un ano contando tickets e mentres a empresa segue sen pagar... teñen pensado contratar persoal ou pagar horas extras para finalizar esta contabilización ou pensan seguir mantendo esta situación até o final de lexislatura?” interpelou o voceiro nacionalista.

“É lóxico que o goberno local non queira dar nin chío sobre a ORA”, asegurou o voceiro do BNG. “O problema xa non é que o expediente que non existira levamos o tema a Pleno en febreiro, porque todos os papeis que figuran nel teñen data posterior ao Pleno”, indicou Del Río. “O maior problema é que queren tomar por parva á xente pretendendo facer crer que unha empresa que rematou un contrato o prorroga a pesar de que di que perde 20 000 euros ao ano” cuestionou.

“Non entendemos que o goberno do PSOE manteña esta situación, que a veciñanza siga pagando cada vez que aparca na zona azul e non vai nada para o Concello” lamentou. “E non entendemos que o goberno local se resista a tomar inmediatamente as medidas necesarias para impedir que a concesionaria siga cobrando sen contrato en concepto de ORA”, engaden desde o BNG. “A veciñanza merece unha explicación pública por parte do goberno sobre todo isto”, advertiu Del Río para exixir que o goberno explicase publicamente o asunto.

Os nacionalistas insisten en que a supresión da ORA sería unha medida beneficiosa para o pequeno comercio xa que “mentres que as grandes superficies dan estacionamento gratuíto, para vir mercar a Betanzos hai que pagar por aparcar”.